بەپێی زانیارییەکان، دامودەزگا ئەمنییەکانی شاری بۆکان لە ساڵیادی ناڕەزایەتییە سەرتاسەرییەکانی ساڵی ١٤٠١دا، هەڕەشەیان لە دوکانداران و کاسبکارەکانی ئەم شارە کردووە کە خۆیان لە داخستنی دوکانەکانیان بەدوور بگرن.
بەپێی ڕاپۆرتی کۆڵبەرنیوز، بە پشت بەستن بە سەچاوە خۆجێیەکان، دامەزراوە ئەمنییەکانی شاری بۆکان فشاریان خستۆتە سەر خاوەن دوکان و کاسبکارانی ئەم شارە و داوایان لێدەکەن لە ساڵیادی ناڕەزایەتییە سەرتاسەرییەکانی ساڵی ١٤٠١دا خۆیان لە داخستنی دوکانەکانیان بەدوور بگرن.
بەپێی ئەم ڕاپۆرتە، هێزە ئەمنییەکان بەڵێنیان لە دووکاندارەکان وەرگرتووە کە خۆیان لە بەشداریکردن لە ناڕەزایەتییەکان و داخستنی دوکانەکانیان لە ٢٥ی خەرمانانی ١٤٠٢ کە ساڵڕۆژی کوژرانی ژینا ئەمینییە بە دووربگرن، بە پێچەوانەوە ناچار دەبن غەرامەی پوڵی بکرێن .
ئەم هەڕەشە و کردەوانەی دامودەزگا ئەمنییەکان لەدژی کاسبکارانی شارەکانی کوردستان، لە کاتێکدایە کە ساڵی ڕابردوو لە کاتی ناڕەزایەتییە سەرتاسەرییەکانی ساڵی ١٤٠١، دوکاندار و کاسبکاران لە زۆربەی شارەکانی کوردستان بە شێوەیەکی بەرچاو بۆ ماوەی ڕۆژانی یەک لە دوای یەک مانگرتنی سەرتاسەرییان گرت و دووکان و بازاڕەکانیان داخست.
