ژنێکی کرێکاری کشتوکاڵی خەڵکی گوندی “تین” لە کاتی کارکردندا کەوتە خوارەوە و گیانی لەدەستدا.
بەپێی ڕاپۆرتی کۆڵبەرنیوز، دوێنێ یەکشەممە ١٧ی پووشپەڕی ١٤٠٣، “خاوەر سادقی” ژنێکی کرێکاری بەشی کشتوکاڵی، خەڵکی گوندی “تین” و دانیشتووی شاری شاهۆ، لە کاتی “تووشیرین چنین” دا لەسەر درەختەکە کەوتە خوارەوە.
“خاوەر سادقی” پاش کەوتنە خوارەوە بۆ نەخۆشخانەی “قودس”ی شاری پاوە گواسترایەوە. بەڵام بەهۆی سەختی برینەکەی و شکاویەکانی لە “جەستە و سەر”ی پاش چەند کاتژمێر گیانی لەدەستدا.
جێگای ئاماژەیە، کە لە ئێران بە گشتی لە ساڵی ١٤٠٢دا لە ڕووداوەکانی کاردا، ٢١١٥ کرێکار (٢٠٩٤ پیاو و ٢١ ژن) گیانیان لەدەستداوە، کە بە بەراورد بە هەمان ماوەی ساڵی پێشوو کە ژمارەی گیانلەدەستدان ١٩٠٠ کەس بوو، بە ڕێژەی ١١.٣ لە سەد زیادی کردووە.
ئێران لە بواری پابەندبوون بە پرسەکانی سەلامەتی کار لە نێو وڵاتانی جیهاندا لە ڕیزبەندی ١٠٢ دایە، کە ئەمەش پلەیەکی زۆر نزمە.
