کۆڵبەرێک خەڵکی شاری شاهۆ لەلایەن هێزەکانی هەنگی مەرزی لە هێڵی سنووری نەوسوود لێدان و ئەشکەنجە کراوە و بە سەختی برینداربوو.
بەپێی ڕاپۆرتی کۆڵبەرنیوز ڕۆژی هەینی ١٤ی گوڵانی ١٤٠٣، هێزەکانی هەنگی مەرزی لە هێڵی سنووری نەوسوود کۆڵبەرێکیان لێدان و ئەشکەنجە کردووە، لووتی شکێنراوە و سەری بە سەختی بریندارکراوە. ناسنامەی کۆڵبەرە بریندارەکە «شەهرام سەوزەواری» خەڵکی شاری شاهۆی سەربە ڕوانسەرە. بەپێی ئەم ڕاپۆرتە هێزەکانی هەنگی مەرزی بە پشتی چەک ناوبراویان لێدان و ئەشکەنجە کردووە و سەری ناوبراو بە سەختی بریندارکراوە.
بە پشتبەستن بەو ئامارانەی لە ساڵی ١٤٠٢ی هەتاوی لە کۆڵبەرنیوز تۆمارکراون، بە گشتی ٤٤٤ کۆڵبەر لە ناوچە سنووریەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە سەربازییەکانی ڕژیم، ڕنو و سەرمابردوویی، چوونە سەرمین، کەوتنەخوارەوە لە شاخ و بەرزایی، کوژراون و برینداربوون. لەکۆی ئەم ژمارەیە بە گشتی ٤٤ کۆڵبەر کە دەبێتە (١٠%) کوژراون و ٤٠٠ کۆڵبەر کە دەبێتە (٩٠%) برینداربوون. لە کۆی گشتی ٤٤٤ کۆڵبەری کە لە ساڵی ١٤٠٢ کوژران و برینداربوون، بەگشتی ٣٧٣ حاڵەت کە دەبێتە (٨٤%) بەهۆی تەقەی ڕاستەوخۆی هێزە سەربازییەکان بووە.
هەروەها لە کۆی گشتی ٤٤٤ کۆڵبەری کە لە ساڵی ١٤٠٢ لە سنووری کوردستان کوژران و بریندار بوون، ٣٧ کەسیان منداڵی خوار تەمەن ١٨ ساڵن.
لە ساڵی ١٤٠٢دا ئێمە شایەتی بەرزبوونەوەی ٩٠٪ی کوژران و برینداربوونی کۆڵبەران لە سنوورەکانی کوردستان بووین.
