وەهاب خەدیری پوور، هاوڵاتی خەڵکی شاری مەهاباد و لە ئەندامانی بنەماڵەکانی شۆڕشی بزووتنەوەی شۆڕشگێڕانەی ژینا بە ١٠ مانگ زیندانی تەعزیری سزادرا.
بەپێی ڕاپۆرتی کۆڵبەرنیوز، وەهاب خەدیری پوور، هاوڵاتی تەمەن ٣٢ ساڵ و خەڵکی شاری مەهاباد و لە ئەندامانی بنەماڵەکانی شۆڕشی بزووتنەوەی شۆڕشگێڕانەی ژینا، لەلایەن دادگای شۆڕشی ئیسلامی مەهاباد بە ١٠ مانگ زیندانی تەعزیری سزادرا. بەپێی ئەم ڕاپۆرتە، ئەم هاوڵاتییە بە تۆمەتی «هاوکاری لەگەڵ حیزبێکی دژبەری ڕژیم» سزادرا.
ڕۆژی چوارشەمە ١٠ی ڕێبەندانی ١٤٠٣، ئەم هاوڵاتییە پاش بانگهێشت و ڕۆیشتنی بۆ ئیدارەی ئیتلاعاتی شاری مەهاباد، دەستبەسەر کرابوو. پێشتریش، ڕۆژی یەکشەمە ٧ی ڕێبەندان، هێزە ئەمنییەکان هێرشیان کردە سەر ماڵی ئەم هاوڵاتییە و پشکنینی ماڵی ناوبراویان کردبوو.
ڕۆژی چوارشەمە یەکی ڕەشەمەی ١٤٠٣، ئەم هاوڵاتییە بە دانانی بارمتەی ٥٠٠ ملیۆن تمەن، بە شێوەی کاتی و تا تەواوبوونی دادگاییەکەی لە زیندان ئازاد کرابوو. ئەم هاوڵاتییە، لە ماوەی دەستبەسەریدا لە دەستڕاگەیشتن بە پارێزەر و بینینی بنەماڵەکەی بێبەش بووە، پاش تەواوبوونی لێپرسینەوەکەی، لە گرتووخانەی ئیدارەی ئیتلاعاتی شاری مەهاباد بۆ زیندانی ئەم شارە گواسترابوویەوە.
وەهاب خەدیری پوور، خێزاندار و باوکی ٢ منداڵە، کوڕی مامی شەماڵ خەدیری پوور، لە گیانبەختکردووانی بزووتنەوەی شۆڕشگێڕانەی ژینایە.
