“ئیدریس مورادی” چالاک و زیندانیکراوی پێشووی سیاسی و خەڵکی ڕوانسەر پاش ئامادەبوونی لە ئیدارەی ئیتلاعاتی ڕوانسەر دەستبەسەرکرا.
بەپێی ڕاپۆرتی کۆڵبەرنیوز ڕۆژی یەکشەمە ١٤ی گەلاوێژی ١٤٠٣، “ئیدریس مورادی” ٤٠ ساڵ تەمەن، چالاکی سیاسی و لە زیندانیانی پێشووی سیاسی خەڵکی ڕوانسەر، پاش ئەوەی لەلایەن ئیدارەی ئیتلاعاتی ئەم شارەوە بانگهێشتکرا، دەستبەسەرکرا و بۆ شوێنێکی نادیار گوازرایەوە.
ناوبراو پێشتر لە ساڵی١٣٩٣ بە تۆمەتی “ئەندامێتی لە یەکێک لە حیزبە دژبەرەکانی ڕژیم” دەستبەسەرکرا و پاش ١٨ مانگ زیندانیکردن لە زیندانی ناوەندی پاوە، لە زیندان ئازاد کرا.
تا ئێستا لە هۆکارەکانی دەستبەسەرکران، تۆمەتەکانی دژی، چارەنووس و شوێنی مانەوەی ناوبراو زانیاریەک لە بەردەستدا نییە.
