عەلی ڕۆحی، لە ئەندامانی پێشووی کۆمیتەی گوندیی ئەنجوومەنی چیای مەریوان، سەرەڕای تێپەڕینی ٤ ڕۆژ لە کاتی دەستگیرکردنی هێشتا دەسبەسەرە و چارەنووسی نادیارە.
بەپێی ڕاپۆرتی کۆڵبەرنیوز، ڕۆژی شەممە ٥ی خەزەڵوەری ١٤٠٣ عەلی ڕۆحی، لە دوائ بانگهێشت کران و چوون بۆ ئیتلاعاتی مەریوان، دەستگیر کرا و بۆ شوێنێکی نادیار گوازرایەوە. عەلی ڕۆحی، ٣٢ ساڵان،هاوڵاتی گوندی ئەسراوا لە شاری مەریوان و لە ئەندامانی پێشووی کۆمیتەی گوندیی ئەنجوومەنی سەوزی چیای مەریوانە.
سەرەڕای تێپەڕ بوونی ٤ ڕۆژ لە کاتی دەستگیرکردنی عەلی ڕۆحی، تا ئێستا بەدواداچوونەکانی بنەماڵەکەی بۆ دەستخستنی زانیاری لەسەر چارەنووسی ناوبراو بێئەنجام ماوەتەوە.
تا کاتی نووسینی ئەم ڕاپۆرتە، هیچ زانیارییەک لەسەر هۆکارەکانی دەستگیرکردنی، شوێنی مانەوە و تۆمەتەکانی دژی ئەم هاوڵاتییە، لەبەردەستدا نییە.
