ئەمڕۆ پێنجشەممە، ٣٠ی خەرمانانی ١٤٠٢، سامان پاشایی و خالد عەبدوڵڵازادە، دوو هاووڵاتی خەڵکی سەقز کە لە مانگی پووشپەڕی ئەمساڵەوە دەستبەسەر کرابوون، پاش دانانی بارمتە لە زیندانی ناوەندیی سەقز ئازاد کران.

بەپێی ڕاپۆرتی کۆڵبەرنیوز، ئەمڕۆ پێنجشەممە، ٣٠ی خەرمانانی ١٤٠٢، دوو هاووڵاتی خەڵکی شاری سەقز بە ناوەکانی سامان پاشایی بە دانانی بارمتەی ٥ میلیارد تمەن و خالید عەبدوڵڵازادە بە دانانی بارمتەی ٣ میلیارد تمەن لە زیندانی ناوەندیی شاری سەقز ئازاد کران.
جێگای ئاماژەیە کە سامان پاشایی، لە ١١ی پووشپەڕ و خالد عەبدوڵڵازادە لە ٢٦ی پووشپەڕی ١٤٠٢، بە بێ فەرمانی دادگا لە لایەن هێزە ئەمنییەکانی شاری سەقزەوە دەستبەسەر و ڕەوانەی گرتووخانەی ئیدارەی ئیتلاعاتی سنە کران و دواجاریش، لە ٢٨ی خەرمانانی ١٤٠٢، بۆ زیندانی ناوەندیی سەقزگواسترانەوە.
پێویستە ئاماژە بەوە بکرێت کە هەردوو ئەم هاووڵاتیانە لە کاتی دەستبەسەرکردنیاندا لەژێر فشاری ئەشکەنجەدا بوون بۆ بەدەستهێنانی دانپێدانانی زۆرەملێ.