تەیفور سەلیمی بابامیری، دانیشتووی شاری بۆکان، سەرەڕای تێپەڕبوونی حەوت مانگ بەسەر دەستبەسەرکرانیدا، هێشتا لە زیندانی ورمێ دەستبەسەر و لە دۆخێکی نادیاردایە.
بەپێی ڕاپۆرتی کۆڵبەرنیوز، تەیفور سەلیمی بابامیری، خەڵک و دانیشتووی شاری بۆکان، سەرەڕای تێپەڕبوونی حەوت مانگ بەسەر دەستبەسەرکرانی، هێشتا لە زیندانی ورمێ دەستبەسەرە. بەپێی ئەم ڕاپۆرتە، تەیفور سەلیمی بابامیری لە چاوپێکەوتنی پارێزەر بێبەش بووە و تەنیا یەک جار چاوی بە بنەماڵەکەی کەوتووە. ئەم هاوڵاتیە لە ماوەی دەستبەسەرکرانیدا چاو و دەست و. سەرشان و گوێی بریندار بووە.
تەیفور سەلیمی بابامیری لە مانگی ڕەشەمەی ١٤٠١ لە لایەن هێزە ئەمنییەکانەوە لە شاری بانە بەبێ فەرمانی دادگا دەستبەسەر و بۆ لێپرسینەوە بۆ یەکێک لە گرتووخانە ئەمنییەکانی شاری ورمێ گوازرایەوە.
تەیفور سەلیمی بابامیری، تەمەن ٤٧ ساڵ، خێزاندار و خاوەنی دوو منداڵ و دانیشتووی شاری بۆکانە.
تا بڵاوبوونەوەی ئەم ڕاپۆرتە هیچ زانیارییەک لەسەر هۆکاری دەستگیرکردن و تۆمەتەکانی ئەم هاوڵاتییە لەبەردەستدا نییە.
