بەتێپەڕبوونی مانگێک لە دەستبەسەری ڕەزا عەلائی، دەرهێنەر و فیلمسازی شاری بانە، هێشتا لە دۆخی ناوبراو زانیاریەک لەبەردەستدا نییە.
بەپێی ڕاپۆرتی کۆڵبەرنیوز بەتێپەڕبوونی مانگێک لە دەستبەسەری ڕەزا عەلائی، دەرهێنەر و فیلمسازی بانە، هێشتا لە دۆخی ناوبراو زانیاریەک لەبەردەستدا نییە. بێ هەواڵی لە دۆخی ناوبراو نیگەرانی بنەماڵەکەی زیاتر کردووە. بەپێی ئەم ڕاپۆرتە ناوبراو لەم ماوەیەدا تەنیا پێوەندییەکی کورتی لەگەڵ بنەماڵەکەی هەبووە و لەوێدا شوێنی مانەوەی ڕانەگەیاندووە.
چوارشەمە ٢١ی خەرمانانی ١٤٠٣ ڕەزا عەلائی، فیلمسازی شاری بانە لەلایەن هێزەکانی ئەمنی بانە لە گەراجی ماڵەکەی دەستبەسەرکرا و بۆ شوێنێکی نادیار گواسترایەوە. دەگوترێت کە دەستبەسەری ناوبراو بەبێ بڕیاری دادگا بووە. ڕەزا عەلائی، فیلمسازی بانە خێزاندار و باوکی ٣ منداڵە. ناوبراو پێشتر کاری سینەمایی زۆری وەکو زنجیرە فیلمی زەوییە پیسەکان «Dirty Lands» دەرهێنەری کردووە. تاکاتی نووسینی ئەم ڕاپۆرتە لە هۆکاری دەستبەسەری، شوێنی مانەوە و تۆمەتەکانی دژی ناوبراو زانیاریەک لەبەردەستدا نییە.
