محەمەد ڕەسوڵ پوور، هاوڵاتی شاری شنۆ بۆ سزای ساڵ و نیوێک بەندکردنی بۆ گرتووخانەی ئەم شارە گواسترایەوە.
بەپێی ڕاپۆرتی کۆڵبەرنیوز ڕۆژی شەمە ٢٦ی خەزەڵوەری ١٤٠٣ محەمەد ڕەسوڵ پوور، هاوڵاتی تەمەن ٥٢ ساڵ خەڵکی شاری شنۆ بۆ سزای بەندکردنی بۆ گرتووخانەی شنۆ گواسترایەوە. بەپێی ئەم ڕاپۆرتە ناوبراو لەلایەن دادگای شۆڕشی شنۆ بە سەرۆکایەتی دادوەر عەلی ئەنساری بەتۆمەتی پێوەندی و ئەندامێتی لەگەڵ پارتێکی دژبەری حکومەتی ئێران، و چالاکی بانگەشە دژی ڕژیم، بە ٢ ساڵ بەندی تەعزیری سزادرابوو کە ئەم سزایە بەپێی مادەی ٤٤٢ی ئایینی دادگا بە ساڵێک و ٦ مانگ بەندی تەعزیری گۆڕا.
هێزە ئەمنیەکان بەبێ بڕیاری دادگا ئێوارەی سێشەمە ١٢ی پووشپەڕی ١٤٠٣ محەمەد ڕەسوڵ پوور، هاوڵاتی گوندی کۆنەقەڵا لە شاری شنۆ دەستگیرکرا و بۆ شوێنێکی نادیار گواسترایەوە. ئەم هاوڵاتیە پاش تەواوبوونی لێپرسینەوەی لە گرتووخانەیەکی ئەمنی ورمێ بۆ گرتووخانەی شنۆ گواسترایەوە و ڕۆژی یەکشەمە ٢٤ی پووشپەڕی ١٤٠٣ بە بارمتەی کاتی ٦٠٠ ملیۆن تمەن تا کۆتایی هاتنی دادگاییەکەی لە گرتووخانە ئازادکرابوو. محەمەد ڕەسوڵ پوور، تەمەنی ٥٢ ساڵ و باوکی ٣ منداڵە.
