جەلال محەممەدی، خالید محەممەدی، مەسعود محەممەدپوور، محەممەد تاهیر ئەلیاسی و ئەیوب ئارمەند، پێنج هاوڵاتیی خەڵکی شاری نەغەدە لەلایەن هێزە ئەمنییەکانەوە دەستبەسەرکران و بۆ شوێنێکی نادیار گواسترایەوە.
بە پێی ڕاپۆرتی کۆڵبەرنیوز، ڕۆژی دووشەممە ٢٤ی بەفرانباری ١٤٠٣ جەلال محەممەدی و جالید محەممەدی، دوو هاوڵاتیی خەڵکی شاری نەغەدە کە ئامۆزای یەکدین لەلایەن هێزە ئەمنییەکانەوە دەستبەسەرکران و بۆ شوێنێکی نادیار گواسترانەوە. بە پێی ئەم ڕاپۆرتە هێزە ئەمنییەکان بەبێ بڕیاری دادوەر کاتژمێر پێنجی سەرلە بەیانی هێرشیان کردە سەر ماڵی تایبەتی ئەم دوو هاوڵاتییە و دەستبەسەریان کردوون.
بە پێی ڕاپۆرتێکی دیکە، ڕۆژی چوارشەممە ٢٦ی بەفرانباری ١٤٠٣ مەسعود محەممەدپوور، هاوڵاتیی تەمەن ٢٥ ساڵ خەڵکی شاری نەغەدە و ئەمڕۆ پێنجشەممە ٢٧ی بەفرانبار محەممەد تاهیر ئەلیاسی و ئەیوب ئارمەند، دوو هاوڵاتیی دیکەی خەڵکی شاری نەغەدە لەلایەن هێزە ئەمنییەکانی نەغەدەوە دەستبەسەرکران و بۆ شوێنێکی نادیار گواسترانەوە. شایانی باسە هێزە ئەمنییەکان بەبێ بڕیاری دادوەر ئەم هاوڵاتییانەیان دەستبەسەر کردووە. تا کاتی نووسینی ئەم ڕاپۆرتە هۆکارەکانی دەستبەسەری، شوێنی مانەوە و تۆمەتەکانی دژی ئەم پێنج هاوڵاتییە ڕوون نییە.
