خەبات دێهدار، زیندانیی سیاسیی پێشوو، لەگەڵ براکەی ڕامیار دێهدار، دوو چالاکی مەدەنی و کرێکاری لە شاری سنە، لەلایەن هێزە ئەمنییەکانی ئەو شارە دەستبەسەر و بۆ شوێنێکی نادیار ڕاگوێزران.
بەپێی ڕاپۆرتی کۆڵبەرنیوز، بەیانی ڕۆژی سێشەممە ڕێکەوتی ٢٨ی خەرمانانی ١٤٠٢، خەبات دێهدار زیندانیی سیاسی پێشوو و ڕامیار دێهدار برای، دوو چالاکی مەدەنی و کرێکاری شاری سنە، لەلایەن هێزە ئەمنییەکانی ئەو شارە دەستبەسەر و بۆ شوێنێکی نادیار ڕاگوێزران. بەگوێرەی ئەم ڕاپۆرتە، هێزە ئەمنییەکان هەڵیانکوتاوەتە سەر ماڵی تایبەتی ئەو دوو هاووڵاتییە و بە پەنابردن بۆ توندوتیژی دەستبەسەر و دەستیان بەسەر کەلوپەلی شەخسیی ئەواندا گرتووە.
جێگای ئاماژەیە کە هێزە ئەمنییەکان بەبێ دابینکردنی فەرمانی دادگا ئەو هاوڵاتیانەیان دەستگیرکردووە. تا ساتی بڵاوبوونەوەی ئەم ڕاپۆرتە، هیچ زانیارییەک لەبارەی شوێنی مانەوە و تۆمەتی ئەو هاووڵاتییانە لەبەردەستدا نییە.
خەبات دێهدار، چالاکی کرێکاری و زیندانی سیاسیی پێشوو، ڕۆژی پێنجشەممە ٢٨ی ڕەزبەری ١٤٠١، لە کاتی ناڕەزایەتییە سەرتاسەرییەکان لەلایەن هێزە ئەمنییەکانەوە دەستبەسەر و ڕۆژی شەممە ٧ی خەزەڵوەری ١٤٠١، پاش دانانی بارمتە لە زیندانی سنە ئازاد کرابوو.
