“سەلیم زولقەرنەین”، “سابیر زولقەرنەین”، “ئیدریس کارساز”، “محەمەد ڕەسوڵ پوور” و “کەمال عوقابی”، هاووڵاتیانی شاری شنۆ لەلایەن هێزە ئەمنیەکانی ئەم شارەوە دەستبەسەرکران و بۆ شوێنێکی نادیار گواسترانەوە.
بەپێی ڕاپۆرتی کۆڵبەرنیوز، پێنج هاووڵاتی بە ناوەکانی “ئیدریس کارساز” و “محەمەد ڕەسوڵ پوور” خەڵکی گوندی “کۆنەقەڵا”، “سەلیم زولقەرنەین” و ” سابیر زولقەرنەین” خەڵکی گوندی “حەسەن نوران” و “کەمال عوقابی”، کوڕی حسێن و خەڵکی گوندی “باڵاگیر”ی سەربە شاری شنۆ لەلایەن هێزە ئەمنیەکانەوە دەستبەسەرکران. لەم ڕاپۆرتەدا بە وەرگرتن لە سەرچاوەیەکی باوەڕپێکراوەوە؛ دەستبەسەری ئیدریس کارساز، سەلیم زولقەرنەین، سابیر زولقەرنەین لە سەرلەبەیانی ڕۆژی چوارشەممە ١٣ی پووشپەڕی ١٤٠٣، لەلایەن هێزە ئەمنیەکانەوە بەبێ بڕیاری دادگا لە ماڵەکەیاندا لە شنۆ ئەنجام دراوە. لەلایەکی دیکەوە، محەمەد ڕەسوڵ پوور و کەماڵ عوقابی لە ئێوارەی سێشەممە ١٢ی پووشپەڕی ١٤٠٣، لەلایەن هێزە ئەمنیەکانەوە بەبێ بڕیاری دادگا دەستبەسەرکراون.
تا کاتی نووسینی ئەم ڕاپۆرتە لە شوێنی مانەوە و تۆمەتەکانی دژی ئەم هاووڵاتیانە زانیارییەک لە بەردەستدا نییە.
