٢ کۆڵبەر بەهۆی تەقەی ڕاستەوخۆی هێزەکانی پاسەوانی سنووری عێراق (حرس الحدود) برینداربوون.
بەپێی ڕاپۆرتی کۆڵبەرنیوز، ئێوارەی دووشەممە ٢١ی ڕەشەممەی ١٤٠٢، هێزەکانی پاسەوانی سنووری عێراق تەقەیان لە کۆمەڵێک لە کۆڵبەران کرد، کە لە ئەنجامدا دوو کۆڵبەر برینداربوون.
ناسنامەی یەکێک لە کۆڵبەرە بریندارەکان «هادی» خەڵکی سەلاس باوەجانییە. ناسنامەی دووەمین کۆڵبەری بریندار تا کاتی نووسینی هەواڵە بۆ کۆڵبەرنیوز پشتڕاست نەکراوەتەوە.
بەپێی هەواڵەکە، هێزەکانی پاسەوانی سنوور کە ویستیان ڕێگری لە تێپەڕینی کۆڵبەران بکەن بەڵام ڕووبەڕووی خۆڕاگری کۆڵبەران بوونەوە، کە لە ئەنجامدا هێزەکانی پاسەوانی سنووریی عێراق تەقەیان لە کۆڵبەران کرد و دوو کۆڵبەر برینداربوون.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
