قەسیم کەریمی کۆڵبەرێکی تەمەن ٢٣ ساڵ خەڵکی گوندی “فیروزیان” سەر بە ناوچەی سۆما برادۆستی ورمێ بەهۆی سەرمابردنەوە لە بەرزاییە سنوورییەکانی تورکیا گیانی لەدەست دا.
بەپێی ڕاپۆرتی کۆڵبەرنیوز، ئێوارەی ڕۆژی یەکشەممە ٢٨ی خەزەڵوەری ١٤٠٢، قەسیم کەریمی کۆڵبەرێکی تەمەن ٢٣ ساڵی خەڵکی گوندی “فیروزیان” لە ناوچەی سۆما برادۆستی شاری ورمێ بەهۆی سەرمابردنەوە لە بەرزاییە سنوورییەکانی تورکیا گیانی لەدەستدا. بەپێی ئەم ڕاپۆرتە، قەسیم کەریمی کوڕی ئیرەج خێزاندارە و خاوەنی دوو منداڵە.
بە پشتبەستن بەو ئامارەی لە کۆڵبەرنیوز تۆمار کراوە، لە ١ی ڕەزبەر تا ٢٨ی خەزەڵوەری ١٤٠٢، بە گشتی ١٤١ کۆڵبەر بەتایبەت ٨ تازە لاوی خوار تەمەن ١٨ ساڵ، لە ناوچە سنوورییەکانی کوردستان بەهۆی هۆکارەکانی وەک تەقەی ڕاستەوخۆی هێزەکانی هەنگی مەرزی، لێدان و ئازاردان لەلایەن هێزە سەبازییەکانی ڕژیم، کەوتنە سەر مین، کوژراو و برینداربوون.
لەم ژمارەیە بەگشتی ٧ کۆڵبەر کوژراون و ١٣٤ کۆڵبەر برینداربوون. لە کۆی گشتی ئەو ١٤١ کۆڵبەرەی کە کوژراو و برینداربوون، ١٢٩ حاڵەت (٩٣%) بەهۆی تەقەی ڕاستەوخۆی هێزە سەربازییەکانەوە بووە.
