بەهۆی کەوتنەخوارەوە لە بەرزاییەوە، کرێکارێکی خەڵکی گوندی “قونێ”ی سەربە ناوچەی سۆمای برادۆستی شاری ورمێ گیانی لەدەستدا.
بەپێی ڕاپۆرتی کۆڵبەرنیوز، پێنجشەممە ٣١ جۆزەردانی ١٤٠٣، “ئەکبەر مەحموودی” تەمەن ٣٠ ساڵ، خێزاندار و خاوەنی دوو منداڵ، خەڵکی گوندی “قونێ”ی سەربە ناوچەی سۆمای برادۆستی شاری ورمێ بەهۆی کەوتنەخوارەوە لە بەرزاییەوە لە کاتی کارکردندا لە شەقامی “مافی”ی شاری ورمێ گیانی لەدەستدا.
جێگای ئاماژەیە، بە گشتی لە ساڵی ١٤٠٢دا لە ڕووداوەکانی کاردا ٢١١٥ کرێکار (٢٠٩٤ پیاو و ٢١ ژن) گیانیان لەدەستداوە، کە بە بەراورد بە هەمان ماوەی ساڵی پێشوو کە ژمارەی گیانلەدەستدان ١٩٠٠ کەس بوو، بە ڕێژەی ١١.٣ لە سەد زیادی کردووە.
ئێران لە بواری پابەندبوون بە پرسەکانی سەلامەتی کار لە نێو وڵاتانی جیهان لە ڕیزبەندی ١٠٢ دایە، ئەمەش پلەیەکی زۆر نزمە.
