«بەناوی ژن ژیان ئازادی»
ئەمساڵ لە کاتێکدا ٨ی مارس بەرز ڕادەگرین کە بەشی زۆرینەی کۆمەڵگە لە تێڕوانینی نەریتی بۆ ژن لە بەستێنە کلتووری، یاسایی و سیاسییەکان تێپەڕیوە و بوونیی ژن دوور لە ڕوانگەی ڕەگەزی لە ڕەهەندە جیاوازە کۆمەڵایەتییەکانەوە بووەتە پرسێکی ئاسایی و پەسەندکراو لەسەر بنەمای یەکسانی مافی ژن و پیاو. ئەم پێشکەوتنە دیسکۆرسیڤە بە بێگومان لە سایەی ساڵانێک خەباتی ژنانی پێشڕەو و پیاوانی یەکسانیخوازدا بەدی هاتووە؛ ژنانێک کە چەقۆی شەرەف لەسەر ملیان بووە و تێڕوانینی نەریتی بۆ ژن ئەوانی لە سووچی ماڵەکاندا بە بیانووی پاراستنی ڕێز و شکۆی ئەوان قەتیس کرد، ئاستیان بە نیوە و بەشیان بە نیوە هەژمارکراوە
ڕاستی ئەوەیە کە پشتیوانی ڕاستەوخۆی ئەم تێڕوانینە دواکەوتووە، ئەو حکومەتانە بوون و هەن کە بەردەوامی و مانەوەی خۆیان بە درێژەکيشانی ئەو ڕەوتە نایەکسان و جیاکارانەی بوونیان هەیە دەزانن، هەر بۆیە ڕێگای پێشکەوتنیان لە ژنان بەست و دەرگای بەندیخانەکانیان بە ڕوودا کردنەوە تاکوو دەنگی مرۆڤانەیان بەکپی بمێنێتەوە.
بزووتنەوە کۆمەڵایەتییەکان کە پاڵنەری گۆڕانی بنەڕەتییە و ڕێنیسانسی هزری کۆمەڵگەکانن، ڕۆڵی کاریگەریان لە گۆرانکاری کۆمەڵایەتی و گۆڕانی وتاری کۆمەڵگە هەبووە. گۆڕانی هزری لە بزووتنەوە کۆمەڵایەتییەکاندا تاقی دەکرێنەوە و هەڵدەسەنگێنرێن و ئەوەیان بەردەوام دەبێ و دەمێنێتەوە کە دەبێتە بەشێک لە ڕاستیی کۆمەڵایەتی گۆڕدراوە و دواتر هەر خۆشی دەبێتە بەستێنی گۆڕانکاری دیکەش.
لە بزووتنەوەی ژن ژیان ئازادیدا، گوتاری پێشکەوتنخواز و فەلسەفەیەکی پێشڕەو، وزەی بەرەوپێشبەری بزووتنەوەکە بوو کە بەپێی لێکۆڵینەوەی گۆڕەپانی باس لە گۆڕینی گوتاری کۆمەڵگە و پەسەندکردنی یەکسانی ژن و پیاو وەک ڕاستییەکی ڕەتنەکراوە لە کۆمەڵگەی ئێراندا دەکات.
ئەوەی پێشکەوتنی بزووتنەوەی «ژن ژیان ئازادی» دیاری دەکات ئامادەیی ئەندێشە و چالاکی ژنانی ئەم بزووتنەوەیە و بزووتنەوەکانی پێشتریشە.
ئەنجوومەنی یەکێتی مامۆستایانی کوردستان لەو باوەڕەدایە کە ئەم گۆڕانکارییانەی خوارەوە دەبێ لە ئەندێشە و نەستی کۆمەڵگە و ڕوانگە و بڕیاری دەسەڵاتداراندا جێ بگرێت:
١- ئازادی ژنان بە پێی بڕگەکانی جاڕنامەی جیهانی مافی مرۆڤ.
٢- ئازادی گشت زیندانیانی پیشەیی و سیاسی ژن.
٣- لابردنی سزای سێدارە بە تایبەت ژنانێک کە بەهۆی هاوسەرگیری لە تەمەنی خوارەوەدا و دۆخی ژیانی ناجێگیر تووشی تاوان بوون.
٤- قەدەغەکردنی تەواوەتی هاوسەرگیری لە تەمەنی منداڵیدا و ڕەچاوکردنی چاکسازی یاسایی خێرا بۆ لابردنی هۆکارەکانی ئەم دیاردە ترسناکە.
٥- دابینکردنی دۆخی جێگیر بۆ خوێندنی کچان و ڕێگری لە وازهێنانیان لە خوێندن.
٦- دابینکردنی دەرفەتی پێشکەوتنی ژنان بەپێی شایستەبوونیان بۆ گرتنە ئەستۆی باڵاترین بەرپرسیارێتییە سیاسی، یاسایی و دادوەرییەکان.
٧- پەسەندکردنی یەکسانی مافی ژن و پیاو لەڕووی پارە و سامان.
٨- هیچکەس خاوەنی ژن نییە و بەبیانووی پاراستنی شەرەف کەسێک مافی نییە کە مافی ژیان لە ژن بێبەش بکات. بۆ ڕێگری لە کوشتنی ژنان لە ژير ناوی شەرەفدا، پەسەندی یاساکانی پاراستنی ژنان پرسێکی پێویستە.
٩- ژنان مافی هەڵبژاردنی جلوبەرگیان هەیە و حکومەت دەبێت ئەمە پەسەند بکات.
ئەنجومەنی یەکێتی مامۆستایانی کوردستان لەو باوەڕەدایە کە قۆناغی هەڵاواردن لە دژی ژنان چووەتە مێژووەوە و عاقڵانەترین ڕێگە بە پەسەندکردنی ڕاستی و ئەو گۆڕانکارییانە دەزانێت کە لە ناو کۆمەڵگەدا ڕوویداوە.
با هەزار (زێ) و (گادەر) و (لاوێنی) ڕوونیشمان هەبێ
تاکو ژن ئازاد نەبێ سەرچاوەکەی ژین لیخنە
«مامۆستا هێمن»
ئەنجومەنی یەکێتی مامۆستایانی کوردستان (سنە، سەقز و زێویە، مەریوان و سەوڵاوا، دیواندەرە)
٨ مارس ٢٠٢٤
١٨ی ڕەشەمەی ١٤٠٢(٢٧٢٣) کوردی
