«عومەر عەبدوڵڵایی، ڕووناک دانشمەند، کاروان ئەحمەدپوور، خالق محەممەدنەژاد، شەهلا ڕەحمانی و یاسا سادقی» شەش شاخەوانی خەڵکی شاری بانە بەهۆی ڕەنووی بەفر و گیرخواردنیان لە بەفردا لە بەرزاییەکانی حەفت تاش لە شاری بانە گیانیان لەدەستدا.
بەپێی ڕاپۆرتی کۆڵبەرنیوز، ڕۆژی هەینی دەی ڕەشەمەی ١٤٠٣، ڕەنووی بەفر لە بەرزاییەکانی شاخی حەفت تاش، سەربە میحوەری بانە بۆ گوندی بیاندەرە، بووە هۆی ونبوونی کۆمەڵێک لە شاخەوان. بەپێی ڕاگەیەندراوی جێگری ئۆپەراسیۆنی ڕێکخراوی فریاگوزاری و ڕزگارکردنی مانگی سوور، ئەم ڕووداوە لە سەرلەبەیانی ڕۆژی هەینی لە ٣٣ کیلۆمەتری میحوەری بانە بۆ مەریوان ڕوویداوە.
پاش چەندین کاتژمێر گەڕان لەگەڵ هەوڵەکانی خەڵکی ناوچەکە و هێزەکانی فریاگوزاری و ڕزگارکردن، لەئەنجامدا تەرمی شەش شاخەوان بە ناوەکانی؛ «عومەر عەبدوڵڵایی، ڕووناک دانشمەند، کاروان ئەحمەدپوور، خالق محەممەدنەژاد، شەهلا ڕەحمانی و یاسا سادقی» کە گیانیان لەدەستدا بوو، لەژێر بەفردا هێنرانە دەرەوە.
