کەریم مەلاعەلیزادە، هاوڵاتی شاری شنۆ لەلایەن ئیدارەی ئیتلاعاتی ئەم شارەوە بانگهێشت و لێپرسینەوەی لەگەڵدا کراوە. بانگهێشتی ئەم هاوڵاتییە لە پەیوەست لەگەڵ بەڕێوەچوونی جەژنەکانی نەورۆزەوە ئەنجامدراوە.
بەپێی ڕاپۆرتی کۆڵبەرنیوز، ڕۆژی چوارشەمە ٢٢ی ڕەشەمەی ١٤٠٣، کەریم مەلاعەلیزادە، بۆ ئیدارەی ئیتلاعاتی شاری شنۆ بانگهێشتکرا. بەپێی ئەم ڕاپۆرتە، ناوبراو پاش ئامادەبوونی لە ئیدارەی ئیتلاعاتی شاری شنۆ، بۆ ماوەی چەندین کاتژمێر لێپرسینەوەی لەگەڵدا کراوە و پاشان ئازادکراوە.
لەم ڕاپۆرتەدا هاتووە، بانگهێشت و لێپرسینەوە لەم هاوڵاتییە لە پەیوەست لەگەڵ شێوەی بەڕێوەچوونی جەژنەکانی نەورۆزەوە لە شاری شنۆ ئەنجامدراوە. هێزە ئەمنییەکان بە ناوبراویان گوتووە کە ڕێوڕەسمەکانی نەورۆز دەبێت لەژێر چاودێری حکومەتدا بەڕێوەبچن.
کەریم مەلاعەلیزادە، چالاکی مەدەنی و ژینگەپارێزی شاری شنۆ و لە ئەندامانی پێشووی دەستەی بەڕێوەبەری ئەنجومەنی ژینگەپارێزی «ژینکۆ» بووە.
