عەلی ئەڵاوەیسی، چالاکی مەدەنی و بەندکراوی سیاسی پێشووی شاری سنە لەلایەن لقی ١ی دادگای شۆڕشی ئیسلامی سنە بە ساڵێک و ٦ مانگ بەندکردن سزا درا.
بەپێی ڕاپۆرتی کۆڵبەرنیوز عەلی ئەڵاوەیسی، چالاکی مەدەنی و بەندکراوی سیاسی پێشووی شاری سنە لەلایەن لقی ١ی دادگای شۆڕشی ئیسلامی شاری سنە بە سەرۆکایەتی دادوەر مستەفا عەزیزی، بە تۆمەتی «ئەندامێتی لە حیزبێکی دژبەری کۆماری ئیسلامی»، بە ساڵيک بەندی تەعزیری و بە تۆمەتی «بانگەشە لە دژی ڕژیم»، بە ٦ مانگ بەندی تەعزیری سزادرا. بەپێی ئەم ڕاپۆرتە دادگای ئەم هاوڵاتییە لە ٢٢ی خەزەڵوەری ١٤٠٣ لە لقی ١ی دادگای شۆڕشی سنە بەڕێوە چوو و ڕۆژی یەکشەممە ٢٧ی خەزەڵوەر سزای سەرەتایی بە ناوبراو ڕاگەیەندرا.
ڕۆژی یەکشەممە ٢٤ی پووشپەڕی ١٤٠٣ عەلی ئەڵاوەیسی، لەلایەن هێزە ئەمنییەکانەوە لە شاری سنە دەستگیر کرابوو. هێزەکان بەبێ بڕیاری دادگا ئەم بەندکراوە سیاسییەی پێشوویان دەستگیرکردبوو. ئەم هاوڵاتییە ڕۆژی چوارشەممە ٢٤ی گەلاوێژی ١٤٠٣ پاش کۆتایی لێپرسینەوە لەگەڵیدا بە بارمتەی ٥٠٠ ملیۆن تمەنی بە شێوەی کاتی لە گرتووخانە ئازادکرابوو.
عەلی ئەڵاوەیسی، لە گوڵانی ١٤٠١ لەلایەن لقی ١ی دادگای شۆڕشی سنە بە سەرۆکایەتی دادوەر سەعیدی بە تۆمەتی «بانگەشە لە دژی ڕژیم» و «هاوکاری لەگەڵ حیزبێکی دژبەری ڕژیم»، بە ٢ ساڵ بەندکردن سزادرابوو. ناوبراو لەلایەن لقی ٤ی دادگای پێداچوونەوەی پارێزگای کوردستان بە تۆمەتی «بانگەشە لە دژی ڕژیم» و «هاوکاری لەگەڵ حیزبێکی دژبەری ڕژیم» و «ڕێکخستنی گروپی نایاسایی»، بە ٤ ساڵ بەندی تەعلیقی و ٥ مانگ بەندی تەعزیری سزادرا. ئەم هاوڵاتییەی شاری سنە لە خەرمانانی ١٤٠١ بۆ سزای بەندکردنی دەستگیرکرا و بۆ گرتووخانەی سنە گواسترایەوە. ناوبراو پاش ٥ مانگ و بە کۆتایی هاتنی ماوەی سزاکەی لە گرتووخانە ئازادکرا. ئێوارەی شەممە ١٨ی گوڵانی ١٤٠٠ عەلی ئەڵاوەیسی، بەبێ بڕیاری دادگا لەلایەن هێزە ئەمنییەکانەوە دەستگیرکرا و ڕۆژی یەکشەممە ٢٣ی جۆزەردانی ١٤٠٠ بە بارمتەی ٢٠٠ ملیۆن تمەنی بە شێوەی تا کۆتایی دادگاییەکەی لە گرتووخانە ئازادکرابوو.
