گۆران خودامورادی، هاوڵاتی گوندی شیان سەربە شاری سنە، پاش تەواوبوونی ماوەی زیندانییەکەی لە زیندانی ناوەندی شاری سنە ئازادکرا.
بەپێی ڕاپۆرتی کۆڵبەرنیوز، ڕۆژی دووشەمە ٢٧ی ڕەشەمەی ١٤٠٣، گۆران خودامورادی، هاوڵاتی تەمەن ٤٠ ساڵ، خەڵکی گوندی شیان سەربە شاری سنە، پاش تەواوبوونی ماوەی زیندانییەکەی لە زیندانی ناوەندی شاری سنە ئازادکرا. بەپێی ئەم ڕاپۆرتە، گۆران خودامورادی، بە هەژمارکردنی ماوەی ٤٠ ڕۆژی دەستبەسەرکرانی، کەمکردنەوەی سزای ٤٥ ڕۆژ بە ملکەچبوونی بۆ ڕای و هەروەها ٤٢ ڕۆژ زیندانی ئەمدواییەدا، لە زیندان ئازادکرا.
ناوبراو ڕۆژی یەکشەمە ١٤ی ڕێبەندانی ئەمساڵ، پاش بانگهێشتکردنی بۆ لقی چواری جێبەجێکردنی سزاکانی دادگای شاری سنە دەستبەسەر و بۆ تێپەڕاندنی ماوەی زیندانییەکەی بۆ زیندانی ناوەندی شاری سنە گواسترابوویەوە.
پێشتر گۆران خودامورادی، لەلایەن لقی یەکی دادگای شۆڕشی ئیسلامی شاری سنە بە تۆمەتی «هاوکاری لەگەڵ یەکێک لە حیزبە ئۆپۆزسیۆنەکانی حکومەتی ئێران و بانگەشە دژی ڕژیم» بە ٤ ساڵ زیندانی دواخراو و ٦ مانگ زیندانی تەعزیری سزای بەسەردا سەپێندرابوو.
ڕۆژی دووشەمە ١٦ی ڕەزبەری ١٤٠٣ گۆران خودامورادی، لەلایەن هێزە ئەمنییەکانی شاری سنەوە دەستبەسەر و بۆ شوێنێکی نادیار گواسترابوویەوە. ناوبراو لە ٢٦ی خەزەڵوەردا بە دانانی بارمتەی ٥٠٠ ملیۆن تمەن بە شێوەی کاتی و تا تەواوبوونی دادگاییەکەی لە زیندانی ناوەندی شاری سنە ئازاد کرابوو.
