کۆڵبەرێکی تەمەن ١٨ ساڵی خەڵکی شاری سەقز، بە تەقەی ڕاستەوخۆی هێزەکانی هەنگی مەرزی لە سنووری بانە بە سەختی بریندار بوو.
بە پێی ڕاپۆرتی کۆڵبەرنیوز، شەوی دووشەممە یەکی ڕێبەندانی ١٤٠٣ کۆڵبەرێکی خەڵکی شاری سەقز لە کاتێکدا هیچ بارێکی هەڵنەگرتبوو لەلایەن هێزەکانی هەنگی مەرزییەوە لە سنووری هەنگەژاڵیی بانە بە چەکی کڵاشینکۆف تەقەی لێکرا و لاقی بە سەختی بریندار بوو. ناسنامەی ئەم کۆڵبەرە سارۆ وەیسی، تەمەن ١٨ ساڵان و خەڵکی شاری سەقز بۆ کۆڵبەرنیوز پشتڕاست کراوەتەوە. شایانی باسە ئەم کۆڵبەرە بە مەبەستی چارەسەر بۆ نەخۆشخانەی سەڵاحەدینی ئەیوبی لە شاری بانە گواسترایەوە.
بەپشتبەستن بە ئامارەکانی کۆڵبەرنیوز، لە ساڵی ٢٠٢٤دا، بە کۆی گشتی ٣٤٥ کۆڵبەر لە ناوچە سنوورییەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بە تەقەی ڕاستەوخۆی هێزەکانی ڕژیم، ڕنوو و سەرما، کەوتنەسەر مین، کەوتنەخوارەوە لە شاخ و بەرزایی و ڕووداوی دیکە کوژرا و بریندار بوون. لەم ڕێژەیە ٥٩ کۆڵبەر واتە (١٧٪) کوژراو و ٢٨٦ کۆڵبەر واتە (٨٣٪) بریندار بوون. لە کۆی گشتی ئەو ٣٤٥ کۆڵبەرەی کە لە ساڵی ٢٠٢٤دا کوژراو و بریندار بوون، ٢٥٩ حاڵەت واتە (٧٥٪) بە تەقەی ڕاستەوخۆی هێزەکانی ڕژیم ڕوویداوە. هەروەها لەم ژمارەیە ٢٢ کۆڵبەر واتە (٦٪) منداڵانی کۆڵبەری ژێر ١٨ ساڵ بوون کە یەکێکیان بەهۆی سەرما و بەستەڵەکەوە گیانی لە دەستداوە.
