چالاک پیرۆزی و کاوە داستان «دەستان»، هاوڵاتییانی دانیشتووی شاری مەریوان و سەیفوڵڵا خان غەفاری، هاوڵاتییانی دانیشتووی شاری سەقز، لەلایەن هێزە ئەمنییەکانەوە دەستبەسەر و بۆ شوێنێکی نادیار گواسترانەوە.
بەپێی ڕاپۆرتی کۆڵبەرنیوز، ڕۆژی شەمە ٢ی خاکەلێوەی ١٤٠٤، چالاک پیرۆزی، کاوە داستان «دەستان» و سەیفوڵڵا خان غەفاری، لەلایەن هێزە ئەمنییەکانەوە دەستبەسەرکران. بەپێی ڕاپۆرتە، دەستبەسەرکرانی چالاک پیرۆزی و کاوە داستان لەلایەن هێزە ئەمنییەکانەوە بەبێ بڕیاری دادوەر لە شاری مەریوان ئەنجامدراوە. هەروەها دەستبەسەری سەیفوڵڵا خان غەفاری، پاش بەشداری لە ڕێوڕەسمی نەورۆزی گوندی کۆنەقەڵا سەربە شاری سەقز، بەبێ بڕیاری دادوەر ئەنجامدراوە.
تا کاتی نووسینی ئەم ڕاپۆرتە، لە شوێنی مانەوە و تۆمەتەکانی دژی ئەم هاوڵاتییانە زانیارییەک لەبەردەستدا نییە.
کاوە داستان «دەستان»، خەڵکی گوندی نەی سەربە شاری مەریوان و چالاکوانی ژینگەپارێزی ئەندامی ئەنجومەنی سەوزی چیای شاری مەریوان، پێشتر مامەڵەی ئەمنی هەبووە و دەستبەسەرکراوە.
چالاک پیرۆزی، تەمەن ١٩ ساڵ، خەڵکی گوندی سەردۆش سەربە شاری مەریوان و ئەندامی ئەنجومەنی سەوزی چیای شاری مەریوانە.
سەیفوڵڵا خان غەفاری، لەدایکبووی ساڵی ١٣٢٦، هاوڵاتی گوندی باشبەلاغ و دانیشتووی شاری سەقزە.
