٣ هاوڵاتی دەستبەسەرکراوی شاری مەریوان لە نەورۆزی ١٤٠٤، بە دانانی بارمتەی ٢٠٠ ملیۆن تمەن بە شێوەی کاتی لە زیندانی شاری مەریوان ئازادکران.
بەپێی ڕاپۆرتی کۆڵبەرنیوز، ڕۆژی شەمە ٩ی خاکەلێوەی ١٤٠٤، «تەحسین دادڕەس»، «کاوە دەستان» و «چالاک پیرۆزی»، ٣ هاوڵاتی کە لە نەورۆزی ئەمساڵدا دەستبەسەر کرابوون، بە دانانی بارمتە بە شێوەی کاتی لە زیندانی شاری مەریوان ئازادکران.
بەپێی ڕاپۆرتی سەرچاوە ئاگادارەکان، ئەم ٣ هاوڵاتییە هەر یەکێکیان بە دانانی بارمتەی ٢٠٠ ملیۆن تمەن ئازادکران. لە ماوەی دەستبەسەریدا، لە دەستڕاگەیشتن بە پارێزەر بێبەش بوون.
تەحسین دادڕەس، زیندانی سیاسی پێشوو و خەڵکی گوندی «سەردۆش»، ڕۆژی هەینی ١ی خاکەلێوەی ١٤٠٤، لە شوێنی کارەکەی خۆیدا بەبێ بڕیاری دادوەر لەلایەن هێزە ئەمنییەکانەوە دەستبەسەرکرا. ناوبراو پێشتر لە جۆزەردانی ١٤٠٠، بە لێبوردنی یاسایی لە زیندانی شاری مەریوان ئازاد کرابوو.
کاوە دەستان، چالاکی ژینگەپارێز و ئەندامی ئەنجوومەنی سەوزی چیای مەریوان، خەڵکی گوندی «نەی» سەربە شاری مەریوان، ڕۆژی شەمە ٢ی خاکەلێوەی ١٤٠٤، بەبێ بڕیاری دادوەر لەلایەن هێزە ئەمنییەکانەوە دەستبەسەرکرا.
هەروەها لە هەمان ڕۆژدا، چالاک پیرۆزی، هاوڵاتی تەمەن ١٩ ساڵ و خەڵکی گوندی «سەردۆش»، کە ناوبراو ئەندامی ئەنجوومەنی سەوزی چیایە، لەلایەن هێزە ئەمنییەکانەوە بەبێ بڕیاری دادوەر دەستبەسەرکرا.
تا کاتی نووسینی ئەم ڕاپۆرتە، لە تۆمەتەکانی دژی ئەم هاوڵاتییانە زانیارییەک بەردەست نییە.
