هێزە ئەمنییەکان لەم ڕۆژانەی دواییدا و لەگەڵ نزیکبوونەوەی ڕۆژی جیهانی ژن لە ڕێگەی پێوەندی تەلەفۆنیەوە هەڕەشەیان لە بەشێکی چالاکانی کرێکاری شاری سنە کردووە. هەڕەشەکانی هێزە ئەمنییەکان لە پەیوەست بە بەڕێوەچوونی ڕێوڕەسمی ڕۆژی جیهانی ژن بووە.
بەپێی ڕاپۆرتی کۆڵبەرنیوز، لە ڕۆژانی ڕابردوودا، هێزە ئەمنییەکانی ئیدارەی ئیتلاعاتی شاری سنە لە ڕێگەی پێوەندیە تەلەفۆنیەکان و هەڕەشەوە، کۆمەڵێک لە چالاکانی کرێکارییان ئاگادار کردووەتەوە کە هەر جۆرێک لە هەوڵدان بۆ بەڕێوەچوونی گردبوونەوە یان بەشداری لە ڕێوڕەسمی هەشتی مارس ڕۆژی جیهانی ژن، ڕێکاری یاسایی دەگرنەبەر. «تەیب چەتانی، لوتفوڵڵا ئەحمەدی، ئێقباڵ شەبانی، خەبات دێهدار و جەمال ئەسەدی» پێنچ کەس لە چالاکانی کرێکارین کە لەلایەن هێزە ئەمنییەکانەوە هەڕەشەیان لێکراوە.
ئەم هەڕەشانە لە کاتێکدایە کە ئەم چالاکە مەدەنییانە، بزووتنەوەی ژنان و بزووتنەوەی کرێکاری کوردستان هەموو ساڵێک بە بۆنەی ڕۆژی جیهانی ژن چەندین ڕێوڕەسمی جیاواز لە شارە جیاوازەکان بەڕێوەدەبەن.
