حەسەن ئەمینی برای محەممەد ئەمینی، یەکێک لە گیانبەختکردوانی شۆڕشی ژینا، لەلایەن دادگای تاوانەکانی بۆکانەوە بە شەش مانگ و پانزە ڕۆژ زیندان و لێدانی چل قامچی سزا درا.
بە پێی ڕاپۆرتی کۆڵبەرنیوز، بە پشتبەستن بەو حوکمەی کە ڕۆژی چوارشەممە ١٤ی پووشپەڕی ١٤٠٢ لە لایەن لقی ١٠١ی دادگای تاوانەکانی بۆکانەوە دەرچووە، حەسەن ئەمینی برای محەمەد ئەمینی، یەکێک لە گیانبەختکردوانی شۆڕشی ژینا، بە شەش مانگ و پازدە ڕۆژ سزای زیندانیکردن و لێدانی چل قامچی سزا درا.
حەسەن ئەمینی لە ١٩ ی جۆزەردان، دوای کۆبوونەوەی ناڕەزایی ژمارەیەک لە بنەماڵەی دادخوازان لەسەر گۆڕی دانیال پایبەندی لەلایەن هێزە ئەمنییەکانەوە دەستگیر کرا. دواجار لە ٢٣ی جۆزەردان، بە دانانی کەفالەت لە زیندانی بۆکان ئازادکرا.
بە پێی ڕاپۆرتە بڵاوکراوەکان، محەممەد ئەمینی لە ١٦ی ڕەزبەری ١٤٠١ لە سەردەمی شۆڕشی ژینا لە شاری سنە ڕاستەوخۆ لە لایەن هێزە ئەمنییەکانەوە تەقەی لێ کراو و گیانی لەدەستدا.
