ئیدریس ئیسماعیلی کۆڵبەری تەمەن ٣٠ ساڵی خەڵکی شاری سەقز، دوای ئەوەی کە بەهۆی تەقەی ڕاستەوخۆی هێزەکانی هەنگی مەرزی بریندار بوو، کەوتە بەر ئازار و عەزیەت و لێدانی هێزە نیزامییەکان
بەپێی ڕاپۆرتی کۆڵبەرنیوز، ڕۆژی سێشەممە ٢٦ی بەفرانباری ١٤٠٢، هێزەکانی هەنگی مەرزی لە هێڵی سنووری بانە بەهۆی تەقەی ڕاستەوخۆ کۆلبەرێکیان بریندار کردوو و دواتر خستیانە بەر ئازار و عەزیەت و لێدان. ناسنامەی ئەم کۆڵبەرە “ئیدریس ئیسماعیلی”، تەمەنی ٣٠ ساڵە و خێزاندارە و خەڵکی شاری سەقزە.
بەپێی ئەم ڕاپۆرتە، هێزەکانی هەنگی مەرزی بانە، دوای ئەوەی بە تەقەی ڕاستەوخۆی ئەم کۆڵبەرە بریندار دەکەن، پاشان بە پۆتینەکانیان لێی دەدەن و پاشان هەر بەو حاڵە بریندارەی، بە تەنیا جێیان هێشتووە،کە دواتر لەلایەن خەڵکی ناوچەکەوە دۆزراوەتەوە و بۆ ناوەندە پزیشکییەکان گواستراوەتەوە.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن
