دوو کۆڵبەر خەڵکی شاری مەریوان لەسەر سنووری تەتە بە تەقەی ڕاستەوخۆی هێزە ئەمنییەکان بریندار بوون.
بەپێی ڕاپۆرتی کۆڵبەرنیوز، ڕۆژی ٣شەممە ٢٦ی مانگی گوڵانی١٤٠٢، هێزەکانی ڕژێم لەسەر سنووری تەتە، بە چەکی کڵاش تەقەی ڕاستەوخۆیان لە کۆڵبەران کرد، کە لە ئاکامدا بووە هۆی بریندار بوونی دوو لە کۆڵبەران.
یەكێک لە کۆڵبەرە بریندارەکان کە ناوی ئەمیرە و خەڵکی دەمەیۆیە، دەست و پەراسووی بریندارە. بەڵام تا ئێستا و گەیشتنی هەواڵەکان بە کۆڵبەرنیوز، هیچ زانیارییەک لەسەر کۆڵبەرە بریندارەکەی تر لەبەر دەستدا نییە.
بە پێی ئەو ئامارانەی کە لە ساڵی ١٤٠١دا لەلایەن کۆڵبەر نیوزەوە تۆمارکراون، بە گشتی ٢٣٤ کۆڵبەر لە ناوچە سنوورییەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بە هۆکارگەلی وەک تەقەی ڕاستەوخۆی هێزە نیزامییەکانی ڕێژیم، مانەوە لە بەفر و بەستەڵەکدا، تەقینەوەی مین، بەربوونەوە لە شاخ و بەرزاییەکان و هتد…کوژراو و بریندار بوون.
لەم ڕێژەیە ٣٩ کۆڵبەر واتە (١٧%) کوژراو و ١٩٥ کۆلبەر واتە(٨٣%) بریندار بوون. هەروەها لە کۆی گشتی ٢٣٤ کۆڵبەری کوژراو و بریندار لە ساڵی ١٤٠١دا، ١٧٢ کۆڵبەر (٧٤%) بە تەقەی ڕاستەوخۆی هێزە سەربازییەکان کوژراو و بریندار بوون.
