دانیشتنی دادگا بۆ لێکۆڵینەوە لە تۆمەتەکانی مەتین حەسەنی، هاوڵاتی خەڵکی شاری بۆکان لە لقی ١٠١ی دادگای دووی ئەم شارە بەڕێوەچوو.
بەپێی ڕاپۆرتی کۆڵبەرنیوز، ڕۆژی پێنجشەمە ٢٧ی گوڵانی ١٤٠٣، دانیشتنی دادگا بۆ لێکۆڵینەوە لە تۆمەتەکانی مەتین حەسەنی، هاوڵاتی شاری بۆکان و لە بریندارانی ناڕەزایەتیەکانی خەزەڵوەری ٩٨ لە لقی ١٠١ی دادگای دووی ئەم شارە بەڕێوەچوو و ناوبراو لەگەڵ پارێزەرەکەی لەم دانیشتنە ئامادەبوون و بە تۆمەتی «هاندانی شەڕ و کوشتار» و «دروشم دژی ڕژیم» تاوانبارکراوە.
مەتین حەسەنی لە خاکەلێوەی ١٤٠٣، بۆ کۆتا بەرگری بە تایبەت تۆمەتی «دروشم دژی ڕژیم» بۆ دادگای ئەم شارە بانگهێشتکرابوو.
ناوبراو لە ٣ی ڕێبەندانی ١٤٠٢، لەلایەن هێزەکانی ئەمنی بەبێ بڕیاری دادگا لە ماڵەکەیدا دەستبەسەر و پاش مانگێک بە بارمتەی کاتی لە زیندانی بۆکان ئازادکرا.
ناوبراو لە ١٩ ساڵیدا لە درێژەی ناڕەزایی جەماوەری خەزەڵوەری ٩٨ لە بۆکان، بە تەقەی گوللە چاوێکی لەدەستدا.
