ڕۆژی چوارشەممە ٩ی ڕەشەممەی ١٤٠٢، هێزەکانی سوپای پاسداران هێرشیان کردە سەر گوندی “ئەنجیران”ی شاری مەریوان و ٢ کەسیان بریندار کرد.
بەپێی ڕاپۆرتی کۆڵبەرنیوز، هێزەکانی سوپای پاسداران هێرشیان کردە سەر گوندی ئەنجیران و تەقەیان لە دانیشتوان و ماڵەکانی ئەم گوندە کرد و بەهۆیەوە ٢ هاووڵاتی (باوک و کوڕێک) برینداربوون.
ناسنامەی بریندارەکانی ئەم ڕووداوە: “عەزیز بارخۆدا” و “مێهدی بارخۆدا” پشتڕاستکراونەتەوە، و بۆ ناوەندە پزیشکییەکانی شاری مەریوان گواستراونەتەوە.
ڕاپۆرتەکان ئاماژە بەوە دەکەن کە هێزەکانی سوپای پاسداران بە گومانی بوونی باری قاچاخ هێرشیان کردووەتە سەر ئەم گوندە و بەهۆی خۆڕاگری خەڵکەوە ناچار بوون گوندەکە جێ بهێڵن.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن .
