پێنجشەممە ٢١ بەفرانباری ١٤٠٢، هێزەکانی هەنگی مەرزی بە چەکی ساچمەیی تەقەیان لە کۆمەڵێک کۆڵبەر کرد لە هێڵی سنوری نەوسود و لە ئەنجام سێ کۆڵبەر برینداربوون.
بەگوێرەی زانیاری کۆڵبەرنیوز، ناسنامەی سێ کۆڵبەرەکە بریتین لە پارسا زوڵفەقاری، هادی مەنسوری و بورهان موزەفەری، هەرسێکیان خەڵکی شاری ڕەوانسەرن. بە پێی ڕاپۆرتەکە ئەم کۆڵبەرانە لە قاچ و خوارەوەی جەستەیان برینداربوون.
بە پشتبەستن بە ئاماری ٢٠٢٣ لە کۆڵبەرنیوز تۆمارکران، بە گشتی ٢٩٩ کۆڵبەر لە ناوچەی سنووری و ڕێگای نێوان پارێزگاکانی ئازەربایجانی ڕۆژئاوا، کوردستان و کرماشان بە هۆکارەکانی وەک تەقەی ڕاستەوخۆی هێزی سەربازی ڕژێم، بەفر و بەستەڵەک گیانیان لەدەستدا، هەنگاو بەسەر مین، کەوتنە خوارەوە لە شاخ و بەرزایی و حاڵەتی دیکە کوژران و بریندارن. لەم کۆی گشتییە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندارن. لە کۆی گشتی ٢٩٩ کۆڵبەر کە کوژران و بریندارن، ٢٦١ حاڵەت (٨٧%) بە تەقەی ڕاستەوخۆی هێزە سەربازییەکانە. هەروەها ٣٠ کەسیان منداڵی خوار ١٨ ساڵن.
