کۆمەڵانی خەڵکی کوردستان، ژنان و پیاوانی ئازادیخواز و لاوانی تێکۆشەر
هەر وەک ئاگادارن سەنگەری ئازادی خوازی و بزووتنەوەی ڕەوای گەلەکەمان چوار لاوی تێکۆشەر, چوار سوورەسواری کۆمەڵەی لە دەست دا. ئەم هاوڕێیانە کە بریتی بوون لە پژمان فاتحی، وەفا ئازەربار، مەحەممەد فەرامەرزی و موحسن مەزڵووم لەگەل بانگی بەیانی ئەمرۆ دووشەممە ٩ی ڕێبەندانی ١٤٠٢ی هەتاویی لە لایەن کۆماری ئیسلامی ئێران ئێعدام کران و پەیوەست بوون ڕیزی شەهیدانی بزووتنەوەی کوردستان.
ئەم هەواڵە جەرگ بڕە دڵی هەموو ئینسانێکی ئازادیخواز و هەموو رۆڵەیەکی ئەم نیشتمانەی بریندار کرد، هەر بۆیە سەرەخۆشی خۆمان ئاراستەی سەرجەم خەڵکی کوردستان، هاوسەنگەران و بنەماڵەی خۆشەویستی ئەم هاوڕێیانەمان دەکەین.
ئەم هاوڕێیانە لە دوای ساڵێک و شەش مانگ ئەشکەنجە و ئازاری زیندان پەیامی خۆڕاگری و خەبات و تێکۆشانیان بە ئێمە داوە و ئاوەدانی سەنگەرەکانیان بە ئێـمە و سەرجەم لاوانی کوردستان سپاردووە. ئێمەش وێڕای ڕێز و وەفا بۆ قارەمانی و لە خۆ بردووی ئەو هاوڕێ ئازیزانەمان، پەیمان دەبەستین کە تا دوایین کاتی ژیانمان درێژەدەری ڕێگای پڕ لە شانازی ئەو هاوڕێیانەمان بین و بەڵێن دەدەین ڕێبوارێکی بە ئەمەک بین بۆ ڕێگا و ڕێبازیان.
هەر وەها داوا لە کۆمەڵانی بەرینی خەڵکی ئەمەک ناسی کوردستان دەکەین وەکوو ڕێز و خۆشەویستی بۆ چوار شەهیدی نوێی بزووتنەوەی ڕەوای گەلەکەمان و هەروەها لە ناڕەزایەتی بە ئیعدامی ئەو ئازیزانە بکەن بە مانگرتنی گشتیی، سبەینێ سێ شەممە ١٠ی ڕێبەندانی ١٤٠٢ی هەتاویی.
کۆمەڵەی ژنانی ڕۆژهەڵات
کۆمەڵەی لاوانی ڕۆژهەڵات
٩ی ڕێبەندانی ١٤٠٢ی هەتاویی
