هێزە سەربازییەکانی ڕژیم لە هێڵی سنووری «پەتکی»ی پیرانشار، دوای تەقەی ڕاستەوخۆ و کوشتنی کۆڵبەرێک، تەرمی ناوبراویان لە ژێر بەفر شاردەوە و شوێنەکەیان بەجێهێشت.
بەپێی ڕاپۆرتی کۆڵبەرنیوز، چوارشەممە ٢٣ی ڕەشەممەی ١٤٠٢، تەرمی «محەمەد گەنجە»، ئەو کۆڵبەرەی کە لەلایەن هێزە سەربازییەکانەوە کوژرابوو، دوای ٤٨ کاژێر هەوڵی هاووڵاتیان دۆزرایەوە.
محەمەد گەنجە ٢ ڕۆژ لەمەوپێش لەلایەن هێزە سەربازییەکانی ڕژیم لە هێڵی سنووری «پەتکە» کوژرابوو. بەپێی زانیاری گەیشتوو بە کۆڵبەرنیوز، هێزەکانی ڕژیم دوای کوشتنی کۆڵبەرەکە، تەرمی ناوبراویان لەژێر بەفر شاردەوە و شوێنەکەیان بەجێهێشتبوو.
شایانی باسە، کە ئەم کۆڵبەرە لە “شانی ڕاستی”یەوە کراوەتە ئامانج و گوللەی لێدراوە.
«محەمەد گەنجە» خێزاندارە و خاوەنی منداڵە، کە ڕۆژی دووشەممە ٢١ی ڕەشەممەی ١٤٠٢، دوای ڕۆشتن بۆ کۆڵبەری بێسەر و شوێن ببوو و دوای ٤٨ کاژێر تەرمی ناوبراویان لەژێر بەفر لەلایەن هاوڵاتیانەوە دۆزرییەوە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
