ئێقباڵ شەبانی، فەردین میرەکی، سەیدخالید حوسێنی، شەیس ئەمانی، فەرشید عەبدوڵڵاهی، سووسەن ڕازانی و جەماڵ ئەسەدی، چالاکانی کرێکاری و ژینگەپارێزی شاری سنە، بانگهێشتی لقی دووی لێکۆڵینەوەی دادگای گشتی و شۆڕشی ئەم شارە کران.
بە پێی ڕاپۆرتی کۆڵبەرنیوز، دادگای لێکۆڵینەوەی حەوت چالاکی کرێکاری و ژینگەپارێز بەم زووانە لە دادگای گشتی و شۆڕشی سنە بەڕێوە دەچێت. بەرەبەیانی ئەمڕۆ ئێقباڵ شەبانی، فەردین میرەکی، سەیدخالید حوسێنی، شەیس ئەمانی، فەرشید عەبدوڵڵاهی، سووسەن ڕازانی و جەماڵ ئەسعەدی بانگهێشتی لقی دووی لێکۆڵینەوەی دادگای گشتی و شۆڕشی سنە کران.
بە پێی ئەم بانگهێشتە، داوا لەم چالاکانە کراوە کە لە ماوەی پێنج ڕۆژدا بەمەبەستی بەرگریکردن لە خۆیان سەبارەت بە تۆمەتەکانی “تێکدانی نەزمی گشتی” و “بانگەشە لە دژی نیزام”، لەم ناوەندە ئامادە بن.
ئێقباڵ شەبانی، فەردین میرەکی، سەیدخالد حوسێنی، شەیس ئەمانی و فەرشید عەبدوڵڵاهی چالاکی کرێکاری لە شاری سنە و سووسەن ڕازانی و جەماڵ ئەسەدی چالاکی ژینگەپارێزی ئەم شارەن.
زۆربەی ئەم هاوڵاتیانە لە حەوتووی ڕابردوودا بانگهێشتی ئیدارەی ئیتلاعاتی شاری سنە کرابوون و سەبارەت بە بەشداریکردنیان لە ڕێورەسمی بەخاکسپاردنی دایکی سێ گیانبەختکردووی بزووتنەوەی شۆڕشگێڕانەی کوردستان و هەروەها چالاکییە پیشەیی و مەدەنییەکانیان، لێپرسینەوەیان لەگەڵدا کرابوو.
شایانی ئاماژەیە کە هەر یەک لەم چالاکانە، لە ڕابردووشدا بە هۆی چالاکیی کرێکاری، کۆمەڵایەتی، ژینگەیی و مافی ژنان، ئەزموونی دەستبەسەربوون و سزادرانیان هەبووە.
