مەسعەب سەبزەواری، کۆڵبەری خەڵکی گوندی “قشڵاخ”ی سەر بە ناوچەی شاهۆی شاری ڕەوانسەر، دوای سێ ڕۆژ ململانێ لەگەڵ مەرگدا، بە هۆی سەختی برینەکانییەوە گیانی لەدەست دا.
بە گوێرەی ڕاپۆرتی کۆڵبەرنیوز، ڕۆژی هەینی ٢٣ی سەرماوەزی ساڵی ١٤٠٣، مەسعەب سەبزەواری، کۆڵبەری برینداریی خەڵکی گوندی قشڵاخی سەر بە ناوچەی شاهۆ لە شاری ڕەوانسەر، بە هۆی سەختی برینەکانییەوە گیانی لەدەست دا. ئەم کۆڵبەرە لە یەکەی چاودێری چڕی نەخۆشخانەی تاڵەقانی کرماشان بە ئاستی هۆشیاری ٣ خەوێندرابوو.
بەرەبەیانی ڕۆژی چوارشەممە ٢١ی سەرماوەزی ساڵی ١٤٠٣، هێزە نیزامییەکانی ڕژیم لە ناوچەی سنووریی نەوسوود کۆمەڵێک کۆڵبەریان دایە بەر دەستڕێژی گوللە کە لە ئەنجامدا کۆڵبەرێک بە ناسنامەی “مەسعەب سەبزەواری” سەر و چاوی زۆر بە سەختی بریندار بوو.
بەپێی ئامارەکانی کۆڵبەرنیوز، لە ٦ مانگی یەکەمی ١٤٠٣دا، ١٤٢ کۆڵبەر لە ناوچە سنوورییەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بە تەقەی ڕاستەوخۆی هێزەکانی ڕژیم، ڕنوو و سەرما، کەوتنەسەر مین، کەوتنەخوارەوە لە شاخ و بەرزایی و ڕووداوی دیکە کوژران و بریندار بوون. لەم ژمارەیە، ٣٦ کۆڵبەر (٢٥٪) کوژران و ١٠٦ کۆڵبەر (٧٥٪) بریندار بوون. لە کۆی ١٤٢ کۆڵبەر کە لە ٦ مانگی یەکەمی ١٤٠٣ کوژران و برینداربوون، ١٢٤ حاڵەتیان (٨٧٪) بە تەقەی ڕاستەوخۆ یان لێدان و ئەشکەنجەی هێزەکانی ڕژیم بووە. لە کۆی ١٤٢ کۆڵبەر کە لە ٦ مانگی یەکەمی ساڵی ١٤٠٣دا لە سنوورە جۆراوجۆرەکانی کوردستان کوژران و برینداربوون، ١٠ کۆڵبەریان منداڵی خوار تەمەن ١٨ ساڵن. بە بەراورکردنی ئاماری ٦ مانگی یەکەمی ١٤٠٣، لەگەڵ نیوەی یەکەمی ١٤٠٢، ئێمە شایەتی زیادبوونی ٦٧٪ی ڕێژەی کوژراو و برینداربوونی کۆڵبەران لە سنووری کوردستان بووین.
