ئیبراهیم عەلیپوور، وێنەگری شاری بانە، خەڵاتی «وۆڵد پرێس فۆتۆ» لە بەشی پرۆژە درێژماوەکان بۆ وێنەگرتن لە کۆڵبەران بەدەستهێنا.
بەپێی ڕاپۆرتی کۆڵبەرنیوز، ئیبراهیم عەلیپوور، وێنەگری شاری بانە، بە کۆمەڵە وێنەکانی خۆی بە ناونیشانی «گوللەکان سنووریان نییە» کە گرنگی بە کار و ژیانی کۆڵبەران لە کوردستان دەدات، بووە براوەی خەڵاتی بڕواپێکراوی «وۆڵد پرێس فۆتۆ» لە بەشی «پرۆژە درێژماوەکان».
ئەم کۆمەڵەیە، گێڕەرەوەی سەختییەکانی کۆڵبەران، باربەرانی سنوور کە بۆ دابینکردنی داهاتی خۆیان لە ڕێگا سەختەکانی چیاکان تێدەپەڕن و هەڕەشە کوشندەییەکان کە لەلایەن هێزە سنووریەکان و دۆخی ناجێگیری سروشتی ڕووبەڕووی دەبنەوە. ئیبراهیم عەلیپوور لەم پرۆژە درێژماوەیەدا، هەوڵیداوە ژیان، ڕەنج و بەرگری کۆڵبەران لە دەرچەی کامێراکەیەوە تۆمار بکات.
خەڵاتی «وۆڵد پرێس فۆتۆ» یەکێک لە بڕواپێکراوترین خەڵاتەکانی وێنەگرتنی هەواڵی لە جیهانە و ئامانجی ئەوان، تۆمارکردن و ڕەنگدانەوەی ڕاستییەکانی گرنگی کۆمەڵایەتی، سیاسی و مرۆیی لە ڕێگەی وێنەگرتنی بەڵگەفیلمەوە بکات. براوەبوونی ئەم کۆمەڵەیە نیشانەی گرنگی بابەتی کۆڵبەری و دۆخی سەختی ژیان لە ناوچە سنووریەکانی کوردستان لە ئاستی جیهاندایە.
ئیبراهیم عەلیپوور «لەدایکبووی ١٣٦٩، لە شاری بانەیە» وێنەگری بەڵگەفیلمی خەڵکی ڕۆژهەڵاتی کوردستانە و لەسەر بابەتە کۆمەڵایەتیەکان و کۆمەڵگا فەرامۆشکراوەکان لە خاورمیانەدا گرنگی دەدات.
