فەرهاد شێخی، چالاکی کرێکاری خەڵکی سەقز کە پێشتر لەلایەن دادگای پێداچوونەوەی پارێزگای ئەلبۆرزەوە هەشت مانگ سزای زیندانی بەسەردا سەپابوو، ئێستاکە ماوەی سزاکەی لە زیندانی ناوەندی کەرەج بەسەر دەبات.
بە گوێرەی ڕاپۆرتی کۆڵبەرنیوز، فەرهاد شێخی، لە کۆتاییەکانی مانگی خەرمانانی ساڵی ١٤٠٣دا، دوای ئامادەبوون لە لقی یەکی جێبەجێکردنی سزاکانی دادسەرای گشتی و شۆڕشی هەشتگەرد دەستبەسەر کرا و بۆ بەسەربردنی ماوەی سزای هەشت مانگ زیندان بۆ زیندانی ناوەندی کەرەج ڕاگوێزرا.
هەواڵنێری هرانا، لە دوایین ڕاپۆرتیدا ئاماژەی بەوە کردووە کە ئەم چالاکە کرێکارییە لە ڕێکەوتی ١٥ی خەزەڵوەردا بە مەبەستی سزادانی بۆ ماوەی پێنج ڕۆژ بۆ یەکێک لە بەندە تاکەکەسییەکانی زیندانی ناوەندی کەرەج ڕاگوێزراوە و پاشان لە ٢٠ی خەزەڵوەردا گەڕێنراوەتەوە بۆ بەندی ١٥ی ئەم زیندانە.
ئەم چالاکە کرێکارییە لە ٨ی خەرمانانی ١٤٠٣ لەلایەن دادگای پێداچوونەوەی پارێزگای ئەلبۆرز بە ٨ مانگ بەندکردن، ٢ ساڵ دوورخستنەوە بۆ شاری دیواندەرە، ٢ ساڵ قەدەغەی ڕۆشتنە دەرەوە لە ئێران و ٢ ساڵ قەدەغەی نیشتەجێبوونی لە پارێزگاکانی ئەلبۆرز و تاران سزا درابوو. ناوبراو لە ٧ی جۆزەردانی ١٤٠٢ لەلایەن هێزە ئەمنییەکان لە ماڵەکەیدا لە هەشتگەرد دەستبەسەر کرا و دواتر بۆ گرتووخانەی ڕەجایی شاری کەرەج گوازرایەوە.
فەرهاد شێخی لە ٢٣ی جۆزەردانی ١٤٠٢ پاش پێداچوونەوەی تۆمەتەکەی لە دادگای هەشتگەرد بە بارمتەی ١٠٠ ملیۆن تمەنی لە گرتووخانەی ناوەندی کەرەج ئازاد کرا. ناوبراو لە پووشپەڕی ١٤٠٣ لەلایەن لقی ١ی دادگای شۆڕشی کەرەج بەسەرۆکایەتی دادوەر سەید موسا ئەسەف حسێنی بە تۆمەتی «چالاکی تەبلیغی دژی ڕژیمی کۆماری ئیسلامی» بە ساڵێک بەندکردن، ٢ ساڵ دوورخستنەوە بۆ شاری دیواندەرە و ٢ ساڵ قەدەغەی ڕۆشتنە دەرەوە لە ئێران و ٢ ساڵ قەدەغەی نیشتەجێبوونی لە پارێزگاکانی ئەلبۆرز و تاران (پاش تەواوبوونی ماوەی دوورخستنەوە) سزا درابوو. دادگای ناوبراو لە ٣٠ی جۆزەردانی ١٤٠٣ بەڕێوەچوو. ناوبراو پێشتریش چەندین جار بەهۆی چالاکییەکانی دەستبەسەر کراوە و سزادرابوو. ناوبراو لە ١٨ی ڕێبەندانی ١٤٠١ پاش لێبوردنی گشتی لە گرتووخانە ئازاد کرابوو.
