ژمارەیەکی زۆر لە ماڵاتی کۆڵبەران لە سنووری هەنجیرانی مەریوان لەلایەن هێزەکانی هەنگی مەرزییەوە کوژران و ئاگریان تێبەردرا.
بەپێی ڕاپۆرتی کۆڵبەرنیوز، ڕۆژی چوارشەممە ٢٤ی ڕێبەندانی ١٤٠٣، هێزەکانی هەنگی مەرزی لە سنووری «هەنجیران»ی سەربە شاری مەریوان، تەقەی ڕاستەوخۆیان بەرەو ژمارەیەکی زۆر لە ماڵاتی کۆڵبەران کردووە و بەهۆیەوە کوژران و پاشان ئاگریان تێبەردراون. لەم ڕووداوەدا ژمارەیەک لە ماڵاتی کۆڵبەران کوژران و ژمارەیەکی دیکەش لەلایەن هێزەکانی هەنگی مەرزییەوە دەستیان بەسەردا گیراوە.
ئەم تاوانەی هێزە ئەمنییەکان لە کاتێکدا ئەنجامدراوە کە پێشتریش چەندین ڕاپۆرتی جیاواز لە کوشتن و دەستبەسەرداگرتنی ماڵاتی کۆڵبەران لەلایەن ئەم هێزەکانەوە بڵاو کرابۆوە. کۆڵبەران کە بەهۆی دۆخی سەختی ئابووری و نەبوونی هەلی کاری گونجاو، ناچاری گواستنەوەی کاڵان لە سنوورەکان، بەم کردارانە لەگەڵ کێشەی زیاتر ڕووبەڕوو دەبن و ئەم کردارانە نەک تەنیا زیانی ماددیان هەیە، بەڵکو بژێوی ژیانی بنەماڵەکانیشیان دەخاتە مەترسییەوە.
