شەیس ئەمانی، کرێکاری خانەنشینکراوی قوماشی کوردستان و لە ئەندامانی دەستەی بەڕێوەبەری یەکێتی ئازادی کرێکارانی ئێران بۆ لقی یەکی دادگای شۆڕشی ئیسلامی شاری سنە بانگهێشتکرا.
بەپێی ڕاپۆرتی کۆڵبەرنیوز، لە ڕۆژانی ڕابردوودا، شەیس ئەمانی، کرێکاری خانەنشینکراوی قوماشی کوردستان و لە ئەندامانی دەستەی بەڕێوەبەری یەکێتی ئازادی کرێکارانی ئێران بۆ دادگا بانگهێشتکرا. بەپێی ئەم ڕاگەیەندراوە ناوبراو دەبێت ڕۆژی سێشەمە ١٩ی خاکەلێوەی ١٤٠٤، لە لقی یەکی دادگای شۆڕشی ئیسلامی شاری سنە ئامادەبێت.
کۆڵبەرنیوز پێشتر لە بانگهێشتی فەرشید عەبدوڵڵایی، ئیقباڵ شەعبانی، جەمال ئەسەدی و ئارمان سەلیمی، چوار کەس لە چالاکانی مەدەنی و کۆمەڵایەتی شاری سنە بۆ ١٩ی خاکەلێوە، بۆ دادگا ڕایگەیاندبوو.
شایانی باسە، کە هەموو ئەم چالاکوانانە پێشتر بەهۆی چالاکییە مەدەنی و کرێکارییەکانی خۆیانەوە دەستبەسەر و مامەڵەی یاساییان هەبووە.
