«محەمەد خزری»، گەنجێکی ٢١ ساڵەی کورد و خەڵکی شاری ئاشخانە سەر بە شاری سەمەلقان لە پارێزگای خوراسانی باکوور، ناسنامەی یەکێکی لە گیانبەختکردووانی نارەزایەتییە جەماوەرییەکانی شاری تارانە کە لە کاتی سەرکوتکردنی نارەزاییانی سەر شەقام گیانی لەدەستدا.
بەپێی راپۆرتی کۆڵبەرنیوز، ڕۆژی پێنجشەممە ١٨ی بەفرانباری ١٤٠٤، محەمەد خزری لە شاری بومهێنی تاران، بە تەقەی ڕاستەوخۆی گوللەی جەنگی لەلایەن هێزە سەرکوتگەرەکانی کۆماری ئیسلامییەوە بە پێکانی دڵی کرایە ئامانج و گیانیبەختکرد. تەرمی ئەم هاووڵاتییە کوردە دوای تێپەڕبوونی نزیکەی یەک هەفتە، لەلایەن خێزانەکەیەوە لە تاران ناسرایەوە و لە ڕۆژی ٢٤ی بەفرانباری ١٤٠٤ لە گوندی “چەخماقلوو”ی سەر بە
شاری ئاشخانە بەخاک سپێردرا.
بەپێی یەکێک لە پەڕەکانی مۆڵەتی بەخاکسپاردنی ئەم گیانبەختکردووە کە بە دەستی کۆڵەرنیوز گەیشتووە، بەرواری گیانبەختکردنی محەمەد خزری ١٨ی بەفرانباری ١٤٠٤ تۆمارکراوە و هۆکاری گیانبەختکردنی وەک “پێکانی جەستەی بە تەنێکی فڕێدراوی خێرا” راگەیاندراوە.
دوای گیانبەختکردنی ئەم گەنجە کوردە، دامەزراوە ئەمنییەکان بە جێبەجێکردنی فشار لەسەر خێزانەکەی، هەوڵیاندا پرۆسەی ڕاگەیاندن دەربارەی چۆنیەتی گیانبەختکردن و وردەکارییەکانی ئەم پرۆسە سنوردار بمێنێتەوە و رێگری لە قسەکردنی بنەماڵەکەی لەگەڵ میدیاکان بکرێت.
