محەمەد محەمەدی (شێخالی)، هاووڵاتی خەڵکی گوندی “شین ئاوا” لە شاری پیرانشار بۆ جێبەجێکردنی حوکمی زیندانییەکەی دەستبەسەر و بۆ زیندانی شاری نەغەدە گواسترایەوە.
بەپێی ڕاپۆرتی کۆڵبەرنیوز، ڕۆژی یەکشەمە چواردەی گوڵانی ١٤٠٤، محەمەد محەمەدی (شێخالی)، هاووڵاتی خەڵکی گوندی “شین ئاوا” و لە دەستبەسەرکراوانی بزووتنەوەی شۆڕشگێڕانەی ژینا، بۆ جێبەجێکردنی حوکمی دوو ساڵ زیندانییەکەی دەستبەسەر و بۆ زیندانی شاری نەغەدە گواسترایەوە.
بەپێی ئەم ڕاپۆرتە، محەمەد محەمەدی، پێشتر بە تۆمەتی “هاوکاری لەگەڵ حیزبێکی دژبەری حکوومەتی ئێران” لەلایەن دادگای شۆڕشی ئیسلامی شاری پیرانشار بە دوو ساڵ زیندانی تەعزیری مەحکوومکرا و ئەم حوکمە لە دادگای پێداچوونەوە پەسەندکرا.
ڕۆژی یەکشەمە هەشتی خەزەڵوەری ١٤٠١، محەمەد محەمەدی (شیخالی)، بەبێ بڕیاری دادوەر لەلایەن هێزە ئەمنییەکانەوە دەستبەسەر و بۆ لێپرسینەوەکەی بۆ گرتووخانەیەکی ئەمنی شاری ورمێ گواسترابوویەوە. ناوبراو پاش دوو مانگ لێپرسینەوە بۆ زیندانی شاری نەغەدە گواسترابوویەوە.
