“ڕەزا ڕەسایی” دەستبەسەرکراوی ناڕازی لە ماوەی ناڕەزایەتیە سەرتاسەریەکانی ١٤٠١ لە شاری سەحنەی کرماشان، لە زیندانی دیزڵاوای کرماشان لەسێدارەدرا.
بەپێی ڕاپۆرتی کۆڵبەرنیوز سەرلەبەیانی ئەمڕۆ سێشەمە ١٦ی گەلاوێژی ١٤٠٣، “ڕەزا ڕەسایی” دەستبەسەرکراوی ناڕازی لە ماوەی بزووتنەوەی شۆڕشگێڕانەی ژینا لە ١٤٠١ لە زیندانی دیزڵاوای کرماشان لەسێدارەدرا.
بە گوتەی فاتمە حەیدەری، لە ئەندامانی بنەماڵەکانی دادخواز حوکمی ناوبراو بەبێ ئاگادارکردنەوەی پێشوەختەی بنەماڵە و مۆڵەتی بینینی بنەماڵەکەی بۆ کۆتاجار جێبەجێکراوە.
لە ناوەڕاستی ڕەزبەری ١٤٠٢، لقی ٢ی دادگای ١ی پارێزگای کرماشان بە دەرکردنی بڕیارێک، “غوڵام ڕەزا ڕەسایی” ناڕەزای ٣٤ ساڵ تەمەن و خەڵکی کرماشان و لە شوێنکەوتوانی ئایینی یارسان بە تۆمەتی “کوشتنی بە ئەنقەست”ی نادر بیرامی سەرۆکی ئیدارەی ئیتلاعاتی شاری سەحنە لە پارێزگای کرماشان بە تۆڵەکردنەوە لە خود مەحکووم کرابوو.
لە کۆتاییدا حوکمی لەسێدارەدانی ڕەزا ڕەسایی لەلایەن لقی ١٧ی دیوانی باڵای وڵات بە سەرۆکایەتی دادوەر محەمەد بارانی پەسەندکرا و لە ١٠ی بەفرانباری ١٤٠٢ بۆ لقی جێبەجێکردنی حوکمەکانی دادگای کرماشان نێردراوە.
شایانی باسە کە ماوەیەک پێشتر، داوای دەستپێکردنەوەی دادگایی ئەم دەستبەسەرکراوە ناڕازییە لەلایەن لقی ١ی دیوانی باڵای وڵات “بێ مەرجی یاسایی” خوێندرایەوە و پەسەند نەکرا.
نادر بیرامی لە ٢٧ی خەزەڵوەری ١٤٠١ لە ماوەی گردبوونەوەی ناڕەزایەتی لە شاری سەحنە و بە توندوتیژبوونی ئەم گردبوونەوەیە بەهۆی هێرشی هێزە ئەمنیەکان و سەربازیەکان بۆ سەر ناڕەزاییان، لە ڕووبەڕووبوونەوەی نێوان هاووڵاتیان و هێزەکان کوژرا.
نزیکەی هەفتەیەک پاش ئەم ڕووداوە، ڕەزا ڕەسایی لە ٣ی سەرماوەزی ١٤٠١ تەنیا بەهۆی ئامادەبوون لە گردبوونەوەی ناڕەزایەتی بە تۆمەتی “بەشداریکردن لە لێدان و ئازاردان”ی نادر بیرامی لەلایەن هێزەکانەوە دەستبەسەرکرا.
لە ماوەی ئەم بەڵگەیەدا، ١٠ کەسی دیکەش لەلایەن هێزە ئەمنیەکانەوە دەستبەسەرکران، بەڵام هێزە ئەمنیەکان کوژرانی نادر بیرامی بە ڕەزا ڕەسایی پێوەند کرد لەکاتێکدا هیچ بەڵگەیەک لەدژی ناوبراو نییە.
