لە ڕووداوێکی هەژێنەردا، ٣ منداڵی کرێکار لە شاری مەریوان بە شێوەی قێزەون لەلایەن خاوەنکارەوە ئازار و ئەشکەنجە دراون.
بەپێی ڕاپۆرتی کۆڵبەرنیوز، ئەم منداڵانە لە کارگەیەکی بەرگدروو سەرقاڵی کارکردن بوون، چەند بەشێکی جەستەیان بە ئوتوی گەرم لەلایەن خاوەنکارەوە ئەشکەنجەدرا و سووتێنراوە.
نەهرۆ خالیدی ١٢ ساڵ تەمەن، ڕێبین قادری و مانی دانش، ٣ منداڵن کە دەگوترێت لەلایەن خاوەنکارەکەیان ئازاری جەستەیی دراون. نەهرۆ خالیدی، یەکێک لە قوربانیانی ئەم ڕووداوە ترسناکە، لە گفتوگۆیەکدا گوتوویەتی کە خاوەنکارەکە بۆ سزادانی ئەوان، چەند بەشێک لە جەستەیانی بە ئوتوی گەرم سووتاندووە. هەروەها ئەم منداڵە باسی ئەشکەنجە و لێدانی پێشووتری خاوەنکارەکەیانی کردووە.
محەمەد ساڵح خالیدی، باوکی نەهرۆ خالیدی، بە پەسەندکردنی ئەم ڕووداوە، لە بەدواداچوونی یاسایی بابەتەکە و ڕۆشتن بۆ پزیشکی یاسایی ڕاگەیاندووە. سەرەڕای ئەمەش، بەهۆی درێژکردنەوەی ماوەی مامەڵە لەگەڵ کەیسەکەدا، بڕیاری بڵاوکردنەوەی گرتەی برینداربوونی منداڵەکان دراوە.
دەگوترێت، کەسی تاوانبار پاش ڕووداوەکە دەستبەسەرکراوە، بەڵام پاش ٢ ڕۆژ بە دانانی بارمتە ئازاد کراوە و ئێستا بە کارکردن لە دوکانەکەی بەردەوامە.
