بە تێپەڕبوونی ٢١ ڕۆژ لە دەستبەسەرکرانی سەرەڕۆیانەی فەریبۆرز سادقی، هاووڵاتیی خەڵکی شاری ئیلام، تا ئێستا هیچ زانیارییەک لەبارەی شوێنی ڕاگرتن و دۆخی ناوبراو لەبەردەستدا نییە.
بەپێی ڕاپۆرتی کۆڵبەرنیوز، ڕۆژی شەممە ٢٠ی بەفرانباری ١٤٠٤، هێزە ئەمنییەکان بەبێ بوونی بڕیاری دادوەری و بە هێرشبردنە سەر دووکانی فەریبۆرز سادقی، ناوبراویان دەستبەسەرکرد و بۆ شوێنێکی نادیار گواستەوە. لەو کاتەوە تا ئێستا خێزانەکەی و نزیکانی هیچ زانیارییەکیان لەبارەی چارەنووسی ئەم گەنجە لەبەردەستدا نییە.
بەپێی ئەم ڕاپۆرتە، لەم ماوەیەدا فەریبۆرز سادقی لە مافی دەستڕاگەیشتن بە پارێزەر و چاوپێکەوتن یان پەیوەندیکردن لەگەڵ خێزانەکەی بێبەش کراوە و فشاری دامەزراوە ئەمنییەکان ڕێگری لە ئاگادارکردنەوە دەربارەی دۆخی ناوبراو کردووە.
