لەگەڵ تێپەڕبوونی ٣٠ ڕۆژ لە دەستبەسەرکرانی خۆسەرانەی «محەممەد جاوادن»، بلۆگەری ناسراو بە ناوی «دووپشکی ڕەش» و هاوڵاتی کورد، خەڵکی گوندی «شوراب»ی سەر بە شاری سیروان، تا ئێستا هیچ زانیارییەکی دڵنیا لەبارەی شوێنی ڕاگرتن و دۆخی ناوبراو بڵاو نەکراوەتەوە و ئەم بێ ئاگایییە، نیگەرانییەکانی دەربارەی ژیان و چارەنووسی ناوبراوی زیاتر کردووە.
بەپێی ڕاپۆرتی کۆڵبەرنیوز، ڕۆژی دووشەممە ٢٢ی بەفرانباری ١٤٠٤، محەممەد جاوادن لەلایەن هێزە ئەمنییەکانەوە و بێ بوونی بڕیاری دادوەری دەستبەسەر و بۆ شوێنێکی نادیار گواستراوەتەوە. لە کاتی دەستبەسەرکرانی ئەم هاوڵاتییە کوردەوە، دامەزراوە ئەمنییەکان هیچ ڕوونکردنەوەیەکی فەرمی دەربارەی هۆکارەکانی دەستبەسەرکران و پڕۆسەی دۆسیەی ناوبراو رانەگەیاندووە.
بەپێی زانیارییە بەدەستهاتووەکان، بەردەوامی بێ ئاگایی لە دۆخی ئەم بلۆگەرە کوردە نیگەرانییە جدییەکانی دەربارەی ئەگەری ئەشکەنجە و فشاری توند لە کاتی دەستبەسەرکراندا بەدوای خۆیدا هێناوە. هەروەها هەندێک لە ڕاپۆرتەکان باسی زیادبوونی نیگەرانییەکان دەکەن سەبارەت بە ئەگەری دەرچوونی سزای سەخت، لەوانە تۆمەتە پەیوەستەکان بە «ڕابەرایەتیکردنی ناڕەزایەتییەکان»، لە دژی ناوبراوە.
شایانی باسە «محەممەد جاوادن» پێشتریش لە کاتی بزووتنەوەی شۆڕشگێڕانەی «ژینا»دا دەستبەسەر کرابوو.
ئەم هاوڵاتییە کوردە لە تەواوی ماوەی دەستبەسەرکرانیدا کە ئێستادا لە مافی دەسڕاگەیشتن بە پارێزەر، پەیوەندی تەلەفۆنی و چاوپێکەوتن لەگەڵ خێزانەکەی بێبەش کراوە و ئەم دۆخە، نیگەرانی توندی خێزانەکەی سەبارەت بە تەندروستی و ئاسایشی گیانی ناوبراو زیاتر کردووە.
