منداڵێکی کۆڵبەری تەمەن ١٧ ساڵ، بە تەقەی ڕاستەوخۆی هێزەکانی هەنگی مەرزی لەسەر سنووری بانە – سەیرانبەند بریندار بوو.
بە پێی ڕاپۆرتی کۆڵبەرنیوز، شەوی ڕابردوو ١٣ی ڕێبەندانی ١٤٠٢، منداڵێکی کۆڵبەر لەسەر سنووری سەیرانبەند – بانە بە تەقەی ڕاستەوخۆی هێزەکانی هەنگی مەرزی بریندار بوو.
ناسنامەی ئەم کۆڵبەرە “دیاکۆ محەممەدی”، ١٧ ساڵ و خەڵکی دیواندەرە ڕاگەیەندراوە.
بەپێی ئەو ئامارانەی لە ٢٠٢٣ لە کۆڵبەرنیوز تۆمارکراون، بە گشتی ٢٩٩ کۆڵبەر لە سنورەکان و ڕێگای نێوان پارێزگاکانی ئازەربایجانی ڕۆژئاوا، کوردستان و کرماشان بە هۆکارەکانی وەک تەقەی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ و بەرزایی و حاڵەتی دیکە کوژران و بریندار بوون. لەم ژمارەیە بەگشتی ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. لە کۆی گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
