ئەحمەد حەسەنزادە تەمەن ٥٦ ساڵ و سۆڵماز حەسەنزادە تەمەن ٢٩ ساڵ باوک و خوشکی محەمەد حەسەن زادە یەکێک لە گیانبەختکردووانی شۆڕشی ژینا لە بۆکان لەلایەن هێزە ئەمنییەکانی شاری بۆکانەوە دەستبەسەر کران.
بەپێی ڕاپۆرتی کۆلبەرنیوز، ڕۆژی سێشەممە ١٤ی خەرمانانی ١٤٠٢، ئەحمەد حەسەنزادە تەمەن ٥٦ ساڵ و سۆڵماز حەسەنزادە تەمەن ٢٩ ساڵ، باوک و خوشکی هەمیشە زیندوو محەممەد حەسەنزادە کە لە شۆڕشی ژینا لە بۆکان گیانی بەختکرد، لەلایەن هێزە ئەمنییەکانی شاری بۆکانەوە دەستگیر کران. بەپێی ئەم ڕاپۆرتە، ئەحمەد و سۆڵماز حەسەنزادە لەلایەن ئیدارەی ئیتلاعاتی شاری بۆکانەوە بانگهێشت کراون و پاش ئامادەبوون لەم دامەزراوە ئەمنییە دەستبەسەر کراون.
محەممەد حەسەنزادە ئێوارەی چوارشەممە ٢٥ی خەزەڵوەری ١٤٠١ لە کاتی ناڕەزایەتییە جەماوەرییەکانی شاری بۆکان، لە کاتێکدا کە لە هەوڵی ڕزگارکردنی کچێکی ڕفێندراو لەدەست هێزە ئەمنییەکان بوو، لەلایەن هێزە ئەمنییەکانەوە بە چەندین چەقۆ و هەروەها فیشەکێک کە بەر سنگ و دڵی کەوتبوو، گیانی بەختکرد.
تا کاتی نووسینی ئەم هەواڵە هیچ زانیارییەک لەسەر تۆمەت و شوێنی ئەو دوو هاووڵاتییە نییە.
