«خالید مەحمودی» هاوڵاتی خەڵکی شاری ڕوانسەر و لە دەستبەسەرکراوانی ناڕەزایەتی جەماوەری ١٤٠١، جارێکی دیکە لەلایەن هێزەکانی ئەمنی شاری جوانڕۆ دەستبەسەر و بۆ شوێنی نادیار گوازرایەوە.
بەپێی ڕاپۆرتی کۆڵبەرنیوز ڕۆژی هەینی ٢٨ی گوڵانی ١٤٠٣، «خالید مەحمودی» هاوڵاتی ٢٠ ساڵ تەمەنی خەڵکی گوندی «شانڕەش» سەربە شاری ڕوانسەر و دانیشتووی شاری جوانڕۆ لەلایەن هێزەکانی ئەمنی شاری جوانڕۆ دەستبەسەر و بۆ شوێنی نادیار گوازرایەوە. هێزەکانی لیباس شەخسی وەزارەتی ئیتلاعات بەبێ بڕیاری دادگا لەسەر شەقام ناوبراویان دەستبەسەرکرد.
خالید مەحمودی ڕۆژی سێشەمە ١ی سەرماوەزی ١٤٠١، لەلایەن هێزەکانی ئەمنیەوە دەستبەسەر و بۆ زیندانی دیزڵاوای کرماشان گوازرابوویەوە.
لە کۆتاییدا پاش تێپەڕینی زیاتر لە ٤ مانگ دەستبەسەری، لە ٦ی خاکەلێوەی ١٤٠٢، بە دانانی بارمتە و بە شێوەی کاتی و تا کۆتایی هاتنی لێکۆڵینەوە لە زیندان ئازادکرابوو.
تا کاتی نووسینی ئەم ڕاپۆرتە لە هۆکارەکانی دەستبەسەری و تۆمەتەکانی دژی ئەم هاوڵاتیە زانیاری بەردەست نییە.
