مۆبین ڕەسوڵتاب و مێهران حەسەنزادە، لە دەستبەسەرکراوەکانی شۆڕشی ژینا، لەلایەن دادگای تاوانەکانی ٢ی شاری شنۆ، حوکمی یەک ساڵ و ٩ مانگ بەندکرانیان بەسەردا سەپێندرا.
بە پێی ڕاپۆرتی کۆڵبەرنیوز، مۆبین ڕەسوڵتاب و مێهران حەسەنزادە بە پشتبەستن بەو حوکمەی کە لە لایەن لقی ١٠١ی دادگای تاوانەکانی ٢ی شاری شنۆوە دەرچووە، حوکمی زیندانیان بەسەردا سەپێنراوە. بە پشتبەستن بەم حوکمە، مۆبین ڕەسووڵتاب و مێهران حەسەنزادە، بە تۆمەتی “کۆبوونەوە و پیلانگێڕی” بە یەک ساڵ و ٩ مانگ زیندان مەحکووم کران.
ئەم دوو هاووڵاتییە لە ٦ی خەزەڵوەری ساڵی ١٤٠١ لە پێوەندی لەگەڵ ناڕەزایەتییە جەماوەرییەکاندا دەستبەسەر و دوای یەک ڕۆژ بۆ زیندانی ورمێ ڕاگوێزران.
موبین ڕەسوڵتاب و مێهران حەسەنزادە لە ڕێکەوتی ٨ی خەزەڵوەری ساڵی ١٤٠١ لە زیندانی ورمێ بۆ زیندانی شنۆ گوازرانەوە.
مێهران حەسەنزادە لە ٩ی خەزەڵوەری ساڵی ١٤٠١ بە دانانی بارمتەی ٢٠٠ میلیۆن تمەن ئازاد کرا و موبین ڕەسوڵتاب لە ١٥ی خەزەڵوەری ساڵی ١٤٠١ بە دانانی بارمتەی ٥٠٠ میلیۆن تمەن لە زیندانی شنۆ ئازاد کرا.
