دوو کۆڵبەری خەڵکی “جوانڕۆ” بەهۆی تەقەی ڕاستەوخۆی هێزەکانی هەنگی مەرزی لە هێڵی سنووری “نەوسود” برینداربوون
بەگوێرەی ڕاپۆرتی کۆڵبەرنیوز، شەوی هەینی ٢٢ بەفرانباری ١٤٠٢، هێزەکانی ڕژێم لە هێڵی سنووری نەوسود بەرەو کۆڵبەران تەقەیان کرد و لە ئەنجامدا دوو کۆڵبەر دەست و پشتیان بە سەختی برینداربوو.
بە پێی ڕاپۆرتەکە، ناسنامەی کؤلبەرەکان بریتین لە “ناسح مورادی” و “ئومێد ئەحمەدی” کە هەردووکیان خەڵکی شاری جوانڕۆن.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن.
